للطلاب.. هذا البريد مفتاحك للمنح الدراسية بالخارج

كتب- عبد الرحمن جمعة

الطالب الجامعي في مصر زي أي طالب في دول العالم المتقدمة، من حيث امتلاكه لـ«البريد الجامعي»، اللي بينتهي بـEDU، وبيفيده في حاجات كتير زي الحصول على المنح الدراسية والتواصل مع الجامعات الدولية، بس للأسف كتير من الطلاب ميعرفوش حاجة عن البريد ده وغالبا مبيكونش معلن عنه.

الإيميل الجامعي بيمثل بطاقة التعريف الإلكترونية ليك زي البطاقة القومية بالظبط بس أون لاين، بيثبت إنك طالب بتدرس في الجامعة، وبيكون مميز فى أي cv يتكتب وانت رايح تقدم على منحة.

كمان بيعتبر إيميل رسمي بتتعامل بيه في الخطابات الرسمية سواء في التعامل مع الشركات أو الجامعات العالمية.

استفاد منه إزاي؟؟

فى شركات عالمية كتير بتمنح للطلاب الجامعيين خدمات مجانية مقابل التسجيل بالميل الجامعي اللي احنا قولنا عليه لأنه بمثابة بطاقتك التعريفية أون لاين.

عندك مثلا شركة «Microsoft»، بتتيح ليك تحميل برامجهم من ويندوز و أوفيس مجانا أول ما تسجل معاهم بإيميل الجامعة، بدل ما كل شوية تتحال على حد من صحابك يديك نسخة ويندوز من عنده.

كمان شركة «adobe» تقدر تحصل على برامجها الأصلية بدون ما يطلب منك الكراك ووجع القلب ده، أما «Prezi» مفيش حد بيعمل «presentations» احترافية إلا ولازم يستخدمه، الشركة بتقدر تمنحك البرنامج الأصلى ليه مجانا بمجرد التسجيل من خلال إيميل الجامعة بس.

ازاى تعمله ؟؟

1-بتدخل على موقع الجامعة وتطبع طلب الإيميل وتملاه.

2- إثبات قيد من الكلية، بتطلعه بحوالي 20 جنيه، لازم يكون مختوم بختم النسر.

3- صورة البطاقة.

4- في وحدة عندك فى الكلية اسمها وحدة الـ«information technology» واختصارها «IT»، تروح لهم وتقولهم أنا عاوز بريد جامعي والموظف هناك هيعملهولك.