السيسي يعلن إنشاء «معرض الإرهاب» خلال احتفالية يوم الشهيد
قال الرئيس عبدالفتاح السيسي، خلال كلمته بالندوة التثقيفية للقوات المسلحة إحياء ليوم الشهيد، اليوم الخميس: «في ناس مش بتنام وفي ناس بتموت أو تستشهد علشان إحنا نكون في سلام ومهم يشعروا واحنا بنعمل كده إن الثمن والتقدير من جانبنا كلنا كبير».
وأضاف الرئيس: «عايزين نكون أكثر صلابة لإن التحديات اللي قدامنا كبير ومش هتنتهي. بناء دولة فيها 105 مليون وأكثر من 6 مليون ضيف واستعادة مكانتها في التعليم والصحة وكل شيء أمر مش بسيط محتاج جهد وتضحية».
وتابع: «بدأت المعركة مع الإرهاب وكان كتير مننا بيسأل امتى تخلص، وبفضل الله كنا عارفين إنها هتخلص».
وأعلن السيسي، أنه في هذا السياق، وجّه بإنشاء معرض للحرب على الإرهاب «هنوريكم الحاجات اللي بقيت وهي مش قليلة. هي كتيرة قوي قوي. من سلاح وذخائر وأجهزة اتصال ومعدات حرب».
وقال الرئيس: «الموضوع هناك مكنش بسيط. الناس متعودة تشوف الحرب دبابات وطيارات بتضرب وحروب تقليدية، لكن الحرب دي كانت أكثر شراسة؛ لإن العدو التقليدي بتشوفه وتقدر تواجهه، لكن العدو ده في وسطينا وبلبسنا وحالنا يمكن وبعدين يقوم بخسة وجبن يهاجمك ويجري، وطبعا الناس بتبقى موجوعة على ولادها ومستقبل بلدها».
وأوضح: «في المعرض هنوريكم صور بالاسم لكل اللي كانوا مجرمين هناك، هنحط الاسم والصورة لكل مجرم من المجرمين دول».
ووجه السيسي رسالة للشعب المصري قائلا: «اوعوا يا مصريين تتسببوا مرة تانية في خراب بلادكم الكلام ده اتعمل لما البلد فكت في 2011، وهفضل أكررها وهتحاسب أمام الله سبحانه وتعالى على الكلام ده، علموا الكلام ده في المدارس والإعلام، وعلموه في الكليات، ده أمر مهم قوي تدمير الدول من الداخل، ده فكر وعلم وعلى اللي بيعملوه أكثر تكلفة».
