لو حاسس بالوحدة.. اعمل كده
الوحدة حالة، في ناس بتدخل فيها برغبتها وفي ناس بتدخل فيها غصب عنها، لأنها مش عارفة إزاي تتعامل مع الناس وتكون صداقات معاهم وبتكون خايفة من رد فعلهم لو اتكلمت معاهم، لو أنت من الناس ديه لازم تكسر الحاجز وتتبع النصائح الأتية..
شغل
انزل اشتغل في أي مكان، لأن الشغل بطبعه بيفتحلك مجال إنك تاخد وتدي مع الناس وتتناقش وتطرح أفكار، لو جاتلك الفرصة إنك تعمل أي حاجة من الحاجات ديه اعملها على طول ومتخفش إنك تتكلم، خليك واثق في نفسك لأن ثقتك ديه هتتنقل للناس حواليك وهيشدهم شخصيتك وهيقربوا منك وهيكونوا عايزين يتعرفوا عليك.
رياضة
لو فيه أي رياضة أنت بتحبها ونفسك تتمرن فيها متضيعش وقت، روح اتدرب على طول لأنك هتعيش روح الفريق اللي هتكسر حاجز الوحدة خالص جواك، هتلاقي نفسك مع الوقت خايف على خسارة فريقك وبتحاول تتكلم وتدي أفكار عشان فريقك يكسب، وده هيخليك تشكر نفسك إنك عرفت تكسر وحدتك عشان تعيش اللحظات الحلوة ديه.
فن
ممكن تشترك في أي فرقة مسرحية وتشارك في التمثيل، لأن المسرح ليه خصوصية بيخليك تعيش حالة تفاعل مباشر بينك وبين الجمهور، وهيخليك تتعرف على ناس كتير وتعمل صداقات أكتر ويبقى ليك معجبينك.
اتفسح
لو حد من أصحابك كلمك وقالك عايزين نخرج مترفضش زي العادة، انزل معاهم وافتح مع الناس مواضيع عامة وخد رأيهم في أحداث بتحصل حوالينا، ولو حد كلمك كلمة متقصرش معاه الكلام لأن ده ممكنيخلي الشخص اللي بيكلمك يتضايق، ويفتكر إنك تنك لأنه أول مرة يتكلم معاك وميعرفكش، وبما انك خارج خدبالك إنك لازم تتبسط في الخروجة ديه وتتعرف على صداقات جديدة.
