مشروعات سهلة والتكلفة بسيطة.. تعرف عليها
مش شرط تبدأ بفلوس كتير عشان تعمل مشروع.. الموضوع مش أكتر من فكرة بسيطة بتنفذها لوحدك أو بمشاركة أصحابك.. هنا بقى هنقدملك مقترحات بعدد من المشروعات بسيطة التكاليف.. وهنقولك إزاي تقدر تنفذها وتنجح فيها.. المهم إنك تعرف إن البدايات دائما لا تكون كبيرة.. ولازم تعرف إن أول خطوة في مشروعك اختيار ما يفضله الناس.. وسرعة اختيار المكان.. ودراسة الفكرة عشان لو محتاج مساعدة تشوف شريك..
بلايستيشن
مشروع شبابي بسيط وسهل.. غير إن تكاليفه قليلة جدا لو اتبعت البساطة في المشروع ومعملتش بقى ديكورات والشغل اللي بياخد فلوس كتير.. أبدأ بالسهل والقليل.. وخدلك محل إيجار جديد في أي مكان 3 سنين كبداية، هتدفع 3 آلاف جنيه مقدم وأصرف 5 تشطيبات وفرش.. ممكن بيهم تعمل ديكورات بسيطة وحلوة زي القعدات العربي على الأرض مثلا..
هتلاقي أجهزة البلايستيشن بأسعارها.. لو جبت 6 أجهزة بيس 4 و 3 هيوصل سعرهم 20 ألف جنيها.. ممكن تدفع نص المبلغ وتقسط النص التاني.
- شراء أجهزة البلايستيشن من هنا سوق
فاضل الشاشات وهتيجي برضو بالتقسيط.. 6 شاشات سعر الواحدة 2000 جنيه.. ممكن تدفع النص وتقسط الباقي.. وفيه أماكن بتقبل القسط الشهري من غير دفع مقدمات زي (بي تك).. بكده البداية مش هتاخد منك أكثر من 25 ألف جنيها لو هتعتمد على نظام التقسيط.. وفي حالة الدفع بنظام الكاش هتتكلف 40 ألف.. يعني لو بدأت أنت و 4 من أصدقائك الموضوع مش هيتعدى 6 آلاف لكل واحد .
كوفي شوب (قهوة بلدي)
في مجموعات شبابية في الصعيد والأقاليم عملوا كافيهات على كورنيش النيل وجوانب الطرق بمنتهى البساطة.. مجرد مكان هاديء يبدأ يلفه "بخوص" أو غاب" ومجموعة كراسي أو ترابيزات بسيطة تكلفتها مش بتتعدى 5000 جنيه .
ممكن ناصية شارع أو مكان فاضي غير مستغل وتبدء تعمل ديكور خفيف حتى بقماش أو غاب.. وده بيعجب الناس جدا على فكرة.
تكاليف العدة لأي قهوة هتدخل في 4000 جنيه في حدود المطلوب والمعقول بس .
لو حسبت تكاليفك وجمعتها كلها هتلاقي الموضوع مش هياخد منك أكتر من 20 ألف جنيه أنت وأصحابك، هيزيد شوية لو قررت تأجر مكان صغير تشتغل منه .
شوف العدة اللي أنت عايزها وتكاليفها كاملة هنـــــــــــــــــــــــــــــــــــــــــا
عربية فول
فيه شباب كتير عمل الفكرة دي.. هو اختار المكان الكويس وأجر العربية عشان مش معاه فلوس يعملها أو يشتريها.. لأن سعرها بيوصل ما بين 5 و8 ألاف جنيه.
هتبقى زيها زي أي عربية فول موجودة.. اللي بيفرق هنا طريقتك أنت وأصحابك وشكل أدواتكم اللي بتستخدموها .
محمد حبيب شاب خريج تجارة وعمل المشروع اتفرج على فكرته من هنـــــــــــــــــــــــــــــــــــــــــــا مكتب مقاولات
كل الأمر إنك أنت وأصحابك هتروحوا لمأمورية الضرائب.. وتطلع بطاقة ضريبية مش هتكلفك أكتر من 100 جنيه.
تروح لشركات المقاولات الكبيرة زي طلعت مصطفى والمقاولين العرب ومختار إبراهيم وغيرهم.. وتسأل على المشاريع الكبيرة اللي شغالين فيها.
في الوقت ده يكون أصحابك جمعوا أكبر عدد من العمال اللي بيدوروا على شغل.. وتكون أنت اتفقت مع إدارات المشاريع دي إنك تورد عمال.. في الغالب هما بيوافقوا على طول لو ورقك سليم.
التكلفة هتبقى 10000 جنيه هتخليهم احتياطي لزوم نقل العمالة دي من أماكنهم لمكان الشغل.. ده غير إنك ملزم بدفع مصاريفهم أول شهر لأن عادة الشركة مش بتقبضك على طول وبصفة مستمرة .
أمثلة مجموعة شباب
محمد وحيد ابتكر فكرة من واقع إن الناس كلها بتكسل تقضي مشاويرها فعمل "مشاوير".. فكرة مبنية على توصيل الطلبات من وإلي البيوت وبقى واحد من أكبر الشركات في المجال ده في مصر .
