لو بتفكر ترتبط بمستقلة.. خلي بالك!
الارتباط مسئولية، لكن الارتباط بمستقلة مسئولية أكبر.. البنت المستقلة مختلفة عن أى بنت تقليدية عايشة طول عمرها في بيت أهلها وبتمر بظروف عادية أو حتى غير عادية، ممكن تقول عليها «superwoman» فلو بتفكر ترتبط بيها ما تحلمش تكون «كل حياتها» لأنه ببساطة ما ينفعش ودي القاعدة الأول.
فكر كده في بنت قدرت تتحدى مجتمعها وتكسر قوانيه اللي مقيداها وترميها لا مؤاخذه في «الزبالة»، عافرت علشان تعيش لوحدها وتكون مسئولة عن نفسها وكل قراراتها بعد كل ده هتحط حياتها بين إيد حد ويبقى هو محورها؟ لأ.
قاموس جديد
لازم تذاكر قاموس جديد في التعامل مع "المستقلة"، مالكش دعوة بـ"فلانة" راضية بإيه في علاقتها مع "فلان" اللي تعرفه، إنت دلوقتي مع كيان مستقل بذاته ما ينفعش حد يتحكم فيها ويؤمرها ويملي عليها قواعد تعيش بيها، حياتكوا هتكون عبارة عن "مشاركة بين إتنين ماشيين كتف بكتف إيديهم في إيد بعض وخطوتهم واحدة" محدش هـ"يشد" التاني ويمشيه وراه وده المفروض يكون في أي علاقة متزنة.
ولو فاكر إن" المستقلة" عيارها فالت ومعندهاش قوانين حاكماها تبقى غلطان، المستقلة ممكن تكون "ملتزمة، محجبة، مش محجبة"..المستقلة ممكن تكون كل اللي عايزه تكونه عشان ده حقها كإنسانة، الفكرة كلها إن قوانينها هى اللي محدداها..هى رئيسة جمهورية نفسها وشايفة اللي يناسبها أو لأ، فلو جاي تهزر وتلعب وأهه وقت يتقضى يبقى "النمرة غلط يا عماد" و"مانعطلكش".
م الآخر يعني إمسحي أصحابك الولاد من على فيسبوك، اللبس ده تغيريه، اتحجي، ما تخرجيش من غيري أو «لأ إقلعي الحجاب مش إنتي مستقلة متحررة؟» بيبي إحنا بنحب بعض «?why not».. لا كده ينفع ولا كده ينفع بصراحة.
ما تكونش ضغط
المستقلة شايلة مسئولية بيت كامل أو حتى "أوضة" وبتعرف تشيل مسئولية نفسها كويس، لكنها مش ناقصة مشاكل وضغط وتعب من أي نوع، عندها ما يكفي فلو هتكون إنت جزء من ده بأي شكل فإتأكد إنها هتخرجك من حياتها بكل أريحية وهتكون هى الكسبانة..طموحاتها وأحلامها مرفوع عليهم يافطة"don`t touch "، دراستها وشغلها هما أولوياتها فوجودك لازم يكون عامل محفز ومشجع ليهم مش ضدهم.
مدعي حرية؟
ما ينفعش تكون «مُدعي حرية» وتنوي ترتبط بمستقلة، هى ياما صادفت زيك كتير وعارفة يعني إيه شعار الحرية يترفع على مركب غرقانة في قيود وعايزة تغرقها فيها كمان، يا تكون "حر" يا بلاش، وإنت وتعريفك للحرية بقى.
ترتبط بيها ليه؟
هتسأل طب وأنا دوري إيه وهى هتعمل لى إيه في حياتي؟ ببساطة هتكونوا سند لبعض، بتبنوا حياة سوية فيها عقلين وقلبين مترابطين، محدش فيها حاكم والتاني محكوم، مش هتلاقي البنت «التافهة» اللي إنت بتشوف من عينتها كتير، هتلاقي عقل واعي وفِكر يساعدك..كل ده مش هيلغي الأنثى اللي جواها بالعكس هيقويها، المستقلة مش عايزة حد يعمل لها حياتها، هى عايزة حد يعمل معاها حياتها.
