طريقة سهلة لعمل اللحم المشوي في العيد (انفوجراف)

أكيد كلنا فى عيد الأضحى هناكل لحمة، وأكيد كل ست بتحتار تعمل إيه وتنوع ازاى فى طريقة أكلها فى العيد، ولو عندك عزومة يبقى مش هتكمل إلا لما تعملى «لحمة مشوية».

هنقولك على طريقة سهلة وبسيطة تعملى بيها «اللحم المشوى»، لأنه من الأطباق اللي كل الناس بتحبها ده غير إنه غنية بالفيتامينات والبروتين.

المقادير

- بصل مفروم

- 2 فص ثوم

- لحم ضاني

- خل

- ليمون

- ربع كوباية زيت زيتون

- بهارات ( ملح ، فلفل ، جوزة الطيب، قرفة ، كمون، مستكة، حبهان)

- طماطم مقطعة شرايح،  بصل حلقات

 الطريقة

اخلطى البصل والبهارات مع بعض فى الكبة،  وتبلى بيهم اللحمة لمدة متقلش عن 4 ساعات لأن كل ما المدة بتبقى أطول بيكون طعمها أحلى، وغطيها بكيس بلاستيك وحطيها فى التلاجة.

«صبعى» اللحمة فى الاسياخ وبين كل قطع اللحم حطى الطماطم وحلقات البصل لأنها بتخلي اللحمة طرية، ورصيها على الشواية وحاولى تكون النار هادية عشان تستوى ومتتحرقش من برة.

اللحمة المشوية بتتقدم مع البطاطس المحمرة وسلطة الطحينة.. وبالهنا والشفا.