فضيحة.. شركة عقار كبيرة في العاصمة تبيع بالدولار وإليكم صورة العقد الرسمي
تداولت إحدى الصفحات عقد رسمي صادر عن إحدى الشركات العقارية الكبرى في مصر، تبيع الوحدات بالدولار، في حي المال والأعمال أحد أشهر وأكبر أحياء العاصمة الإدارية الجديدة، والمجاورة لمقار الوزارات والبنوك.
شركة سياك العقارية تبيع الوحدات بالدولار
ونشر حساب أخفى هويته على صفحة ملاك العاصمة الإدارية الجديدة عبر موقع التواصل الاجتماعي «فيس بوك» صورة عقد شركة سياك العقارية مرفقة بتعليق: «ده عقد شركة سياك في الحي الحكومي، حسبي الله و نعم الوكيل في شركات البروكر اللي ورطونا معاهم، ببعت العقد للسيلز بيقول لي مقدرش اغير حاجة فيه».
وأضاف الحساب: «طيب عايز ارجع فلوسي بيقول لي المقدم غير مسترد، هي فلوس الناس لعبة.. مصاريف الصيانة بالدولار ليه إن شاء الله؟ ده غير قانوني، الرد بتاع الشركة.. ده اللي عندنا يا عم اعمل لك توكيل عام ببيع الوحدة، طب لو اتأخرت أسبوع تتفسخ العقد».
وتابع المنشور: «شركة كبيرة زي كده تخلي الناس هي المسئولة المقايسات العامة عند المياه المبردة والكهرباء ليه؟ هو مش انتو مطورين؟ السيلز بيقنعني ان كل شركات حي المال كده وده نظامهم».
الرد على بيع شركة سياك العقارية بالدولار
ورد حساب باسم أسامة محسن قائلاً: «أولاً للتوضيح مش ده العقد، وتم تعديل بنود كتير في العقد، تاني حاجة مفيش بياع في الشركة هيقول لحضرتك ده اللي عندنا، ثالث حاجة حضرتك كنت ممكن تشرفنا في الشركة أو ما ينوب عن حضرتك وتستفسر بشكل رسمي عن كل حاجة، رابعًا أي بند حضرتك معترض عليه له أصل قانوني وممكن حضرتك تحضر بالمحامي وحضرتك تستفسر عن أي بند من خلال الشؤون القانونية لدى الشركة».
وأضاف: «البوست اللي حضرتك كاتبه ليس إلا تشويه في سمعة شركة كبيرة وثاني المعلومات اللي حضرتك بتقولها مغلوطة من ضمنهم إن الصيانة بالجنيه المصري وإن الفسخ بعد أسبوع، لا يا فندم الفسخ بعد ٦٠ يوم من تاريخ القسط اللي انا بأخذه من حضرتك مؤخر يعني بعد ٩٠ يوم دون سداد أي فلوس، والتوكيل بيتم العمل به بعد ذلك في حالة الفسخ مع استرداد المبلغ إلى العميل ،لو ده هيزعل حضرتك يبقى حضرتك متأكد أنك مش هتكون ملتزم في الأقساط، وزي ما حضرتك مهتم إنك تضمن حقك وهو بالفعل مضمون لأن المشروع مبني بالكامل وحضرتك بتسدد على ٥ سنوات، المطور من حقه يضمن حقه دون مخالفة القانون المصري أو العرف المتبع في السوق العقاري المصري، والعقد ده موجود في كل المطورين الكبار أمثال سودك وأعمار» .
واختتم تعليقه بقوله: «هرجع ابلغ حضرتك تاني، الشركة مفتوحة لحضرتك أي وقت للرد على جميع الاستفسارات غير الموضحة لك، لكن المكان هنا مش مجال للاستفسار لأن أصلاً حضرتك بتعرض معلومة غلط وشكرًا جزيلاً».
