طلع «البعبع» اللي جواك
كنا فاكرين زمان إن «البعبع» هو اللي مستخبي في الضلمة جنب الدولاب أو ورا الستارة؛ وأول ما ننام هيطلعلنا.. لأ خالص؛ البعبع بعد ما كبرنا لسه في الضلمة بس مش في الأوضة بقي في قلوبنا ونفوسنا.. بقينا نخاف من «بعابيع» كتير وكل يوم يظهر واحد جديد.
تعالي نطلع مع بعض أكتر «البعابيع» إللي جوانا.. يمكن نبطل نخاف
المذاكرة
أول حاجة بنوعي عليها في دنيتنا هي المذاكرة؛ إصحى بدري عشان تروح الحضانة وبعدها المدرسة وبعدها الكلية، وبيفضل بعبع المذاكرة يطاردنا أكتر من 15 سنة خصوصًا لو إنت من الأشخاص إللي مش بتحبها أو حتي العكس وعايز تطلع الأول علي طول؛ فديما عندك "بعبع" إنك متنجحش.
بلاش خوف.. اتعامل مع المذاكرة علي إنها واجب قومي لنفسك عشان تحقق إللي نفسك فيه حتي لو كان نجاحك عشان بابا يجيبلك هدية؛ المذاكرة مش "بعبع". قلل خوفك منها وإعمل أكتر من حاجة في نفس الوقت إلعب رياضة أو اتسلي بهواية بتحبها.
كلام «الحكومة»
كتير فينا بيسمع كلام بابا وماما خوف منهم بس، والأكتر بيمثل إنه بيسمع الكلام لكن في الأخر بيعمل إللي علي مزاجه، وفي الحالتين دول بيجي عندنا "بعبع الحكومة" إللي هما "بابا و ماما" زي ما كتير بيسميهم، وتتربي عندنا عقدة سمع الكلام بالغصب.
مش لازم نسمع كلامهم بس عشان خايفين منهم، ممكن احترامهم وتقدير مجهودهم معانا ومن باب إنهم أكبر مننا وتجاربهم أكتر... علي الأقل من باب رضاهم علينا زي ما ربنا وصانا، الدعوة الحلوة منهم هتعدل حياتك.
الثانوي
والله مش عارفة أقول في "البعبع" ده إيه، بصراحة هيا "بعبع" أهالينا أكتر ما بتكون "بعبع" لينا إحنا؛ عشان كده من الآخر الثانوي مش "بعبع".
ظبط وقتك بين المدرسة والدروس ومذاكرتك، ابدأها مذاكرة من البداية هتلاقي نفسك في الآخر معاك المنهج ومذاكره كويس .. شوية تركيز ويروح "البعبع".
العنوسة
"إنت/ إنتي" عانس ديه كلمه بايخة جداً؛ طبعا هيا بتتقال كتير للبنات، لكن في مجتمعنا دلوقتي بقت برده تتقال عن الولد، مفيش حاجة اسمها عنوسة وإنك تفضلأو تفضلي لوحدك.
الجواز نصيب حتي لو وصلت لسن الـ60 وأي حد يقولك كده اتفرج إنت علي حياته وهو متجوز، يمكن تعرف حكمة ربنا في تأخير جوازك.
أحسن واحد
"بعبع" جديد بقي عند كتير مننا "عايز تبقي أحسن واحد في الدنيا" ومالك في أيديك كل حاجة. لآ مفيش كده؛ متحطش في بالك إنك هتملك كنز "علي بابا" وهتكون "هارون الرشيد" وإنتي هتكوني الملكة "إليزابيث"، وتبدأ تسيب مستقبلك وأحلامك وتجري ورا أوهام زي إنك تكون أغني رجل في العالم أو إنك تبقي أجمل بنت.
مش عيب إنك تكون الآغني أو الأجمل بس "البعبع" بيجي لما يتحول لخوف إنك متكونش الحاجات ديه.
سيبك من "بعبع" احسن واحد وواحدة، ربنا بيقسم الأرزاق في كل شىء فأرضي بالمكتوب وإمنع نفسك إنك تكون عبد للدنيا.
الجواز
"البعبع" الكبير، جوازك مش أخر الدنيا ولا هو نهاية لحياة العزوبية الحلوة، ولو خايف من تحمل المسؤولية حط في بالك إن المسؤولية مقسومة نصين مش علي نص واحد، في ولاد وبنات بتخاف من الجواز لعقدة أو مشكلة حصلتلهم زمان وبيقرروا يعيشوا الوحدة ويضيعوا أحلي فرص حياتهم.
سيبك من "بعبع" المسؤولية إنت ممكن تعيش لوحدك وتشيل مسؤولية أكبر فأحسنلك إقسمها مع حد تاني.
كل حاجة جديدة
طلعت من إعدادي وداخل ثانوي، خلصت ثانوي ورايح الكلية، داخل علي شغل جديد، كل حاجة جديدة لسه هندخلها بنخاف منها، حتي لو متعود علي كافيه معين مش بتحاول تجرب غيره، ليه نعمل في نفسنا كده ؟.
مفيش "بعبع" للجديد، جرب وعيش وحاول ولو عجبك الوضع يبقي الدنيا حلوة، معجبكش مخسرتش حاجة، يكفيك شرف المحاولة.
