رئيس التحرير أحمد متولي
 عايز تألف فيلم رعب «مختلف»؟.. انسى الأفكار دي

عايز تألف فيلم رعب «مختلف»؟.. انسى الأفكار دي

لو بتحب أفلام الرعب ونفسك تخوض تجربة تأليف فيلم رعب مصري يخلي كل العالم يعرفوا إن احنا نقدر نخوض تجربة اخراجه بفكرة مختلفة ننافس بيها أفلام رعب أجنبية على جوايز في مهرجانات دولية، يبقى حاول إنك تخرج برة الأفكار التقليدية اللي بيتعمل بيها معظم أفلام الرعب الأجنبية عشان متبقاش بتقلدهم.

وعشان متقعدش تعصر دماغك في التفكير هما بيقدموا ايه وانا مفروض أبعد عن ايه، "شبابيك" جمعتلك الأفكار  اللي تخرج براها وتفكر في فكرة مختلفة.

عروسة ملبوسة

العروسة  اللعبة اللي لابسها روح شريرة وبتقتل كل الناس  وبيبقى فيه منها أشكال مختلفة فمثلاً هنلاقي اللي  على شكل طفل زي فيلم chucky أو شكل بنت زي فيلم the conjuring أو شكل راجل زي فيلم the dead silence وهنلاقي ان أشكال العرايس ديه اتعمل بيهم أفلام كتيرة جداً وده بجانب أشكال مختلفة عن أشكال العرايس ديه وبيبقى بطل الفيلم اما عروسة واحدة أو مجموعة عرايس.

بيت مسكون بأرواح شريرة 

في أفلام كتيرة تلاقي أبطالها رايحين يشتروا بيت جديد بدل بيتهم القديم والبيت الجديد ده بيكون في الغالب حصل فيه حادثة بشعة وأصحاب البيت اتقتلوا فيه  ومع أول يوم للأسرة الجديدة في البيت الجديد بتبتدي الروح الشريرة للناس اللي اتقتلوا في المكان تتحرك في البيت.

وبجانب الروح الشريرة اللي بتكون ساكنة البيت في أفلام كمان بنلاقي فيها روح شريرة لابسة أشخاص عايشين في البيت والروح ده بتسلطهم انهم يخوفوا الناس.

أصحاب طالعين سفاري وياكلهم حد

فيه بقى كمية أفلام متلتلة زي ما بيقولوا بيبقى الفكرة فيها ان اصحاب طالعين يعملوا سفاري في أي مكان وفي نص فسحتهم بنلاقي  فيه حد بيتابعهم بيعملوا ايه وبيبتدي يراقب كل واحد وواحدة وفجأة يطلع عليهم ياكلهم وده بقى بنسميه  أكلي لحوم البشر.

أفلام معاقبة الذات 

وديه بقى زي أجزاء أفلام saw وأفلام تانية غير Saw اللي بتعتمد ان فيه حد بيجمع ناس ميعرفوش بعض في مكان ويبتدي يعاقبهم على أخطاء عملوها في حياتهم بس عقاب بيوصلهم انهم يشوهوا كل جزء فيهم.

التركيبات القاتلة 

ديه بقى الأفلام اللي بنلاقي فيها علماء بيقعدوا يعملوا تركيبات مختلفة على دودة أو طير وبعد نلاقي الدودة  تنتشر في مدينة ما وتقتل الناس ويكتشف العلماء بعدين انهم عملوا خطأ في التركيبة طلع الدودة بالشكل المتوحش ده وفيه أفلام بيكون العلماء عاملين التركيبة ديه قاصدين بها انهم يموتوا الناس كغرض حربي مثلاً يستخدموه في قتل عدوهم بس للأسف في ناس بريئة بتموت.

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»