لو البنت «فركشت».. مينفعش تسمع الكلام ده

من وقت للتاني بنسمع خبر إن في واحدة من صاحبتنا فركشت مع الولد اللي مرتبطة بيه.. وأنه قرر يسيبها بدون سبب مقنع بالنسبة ليها.. وده بعد قصة حب كل الناس كانت بتحكي وتتحاكي عنها.. وخبر زي ده بيخلينا نتصدم ونكون عايزين نتكلم مع صاحبتنا عشان نعرف ليه وإزاي حصل كده.. ديه بقى النقطة اللي «شبابيك» عايزة تتكلم معاكوا فيها..

لما تروجى تتكلمي مع صاحبتك اللي فركشت خدي بالك متقوليلهاش الحاجات ديه خالص:

معلش

هى موقعتش من على العجلة أو اتخبطت في صباع رجلها الصغير.. أو المانكيير جه على هدومها عشان تقولي معلش.. ديه حبها اللي بنت عليه حاضرها ومستقبلها سابها وخلع.. معلش ديه كلمة مينفعش تتقال أبدا مع كارثة زي ديه.. صاحبتك اتكسر قلبها مش اتكسرت كوبايتها.

غلطانة

لما تحكيلك إنها استحملت كتير جدا في العلاقة ديه.. متقولهاش جملة انتي اللي غلطانة كنتي لازم تسيبيه من الأول.. لأن جملة زي ديه هتكون مستفزة جدا لأنها عارفة من جواها إنها غلطانة ومش ناقصة تأنيب ضمير من حد.. فإنتي لما تقولي كده هتخلي وجعها يزيد وهتخلي ضميرها يموتها.

ده كان برقبتك

لو إنتي كنتي عارفة إنها كانت مرتبطة بحد قبل كده وهى اللي سابته مع إنه كان بيحبها متقوليلهاش جملة فاكرة الشخص الفلاني ده كان برقبته.. ياريتك كنتي فضلتي معاه وموقعتيش مع الواد اللي غدر بيكي ده.. لأن جملة زي ديه هتخليها تتحسر وتحس بالفشل و إنها مكنتش صح في اختيارها.

استعجلتي

لما تحكيلك المشكلة كلها بكل تفاصيلها متقوليلهاش جملة على فكرة أنتي استعجلتي في ارتباطك ده.. لأن بكده أنتي بتندميها على إنها اتكلمت معاكي في الموضوع.. لأنك بتتكلمي معاها عشان تكرهيها في عيشتها مش عشان تحاولي تقفي معاها.. وتخليها تعدي المرحلة الصعبة ديه من حياتها.

اسكتي

لما تشوفي في أي مكان الولد اللي كانت مرتبطة بيه وسابها.. متقوليلهاش جملة اسكتي مش شوفته إمبارح في الحتة الفلانية عشان أنتي كدة بتفكريها بيه وهى أصلا عايزة تنسى صورته ومش عايزة حد يكلمها عنه.