3 طرق لكسر الروتين.. إنك تتوه في الشارع واحدة منهم
كتير مننا بيعاني من الروتين والإحساس إن مفيش عنده وقت لأي حاجه، رغم إن فيه حاجات صغيرة ممكن تعملها تجدد بيها يومك وزي ما بيقولوا السر دايما في التفاصيل.
«شبابيك» بتقدملك في التقرير ده 3 طرق تكسر بيها الروتين وتخرج الطاقة السلبية اللي جواك.
إمشي
كده كده الدنيا زحمة وبتوقف كتير، فأول ما الدنيا تقف قريب من الشغل بدل ما تفضل قاعد جوه المواصلات مستنى الفرج إنزل وإمشي ولو عشر دقايق للشغل.
المشى الصبح مش بس رياضة مفيدة، ولكن نفسيا المجهود إللي بتبزله بيخرج طاقتك السلبية وحركة الدم داخل الجسم بتخلي المخ ينشط فعشان كده المشي أحسن حاجة بعد الشغل وقبل الشغل عشان تصفى ذهنك.
لون
اليومين دول على "فيس بوك" كتير من الناس بيتكلموا عن كتب التلوين للكبار وأد إيه الموضوع بيضيع التوتر وبيزيل الضغط عن الإعصاب. الكتب والألوان دى غاليا جدا، بس ممكن تجيب كراسة رسم أو تطبع الرسومات من النت وشوية ألوان والموضوع كله مش هيعدى عشرين جنيه.
الشخبطة و الألوان نوع من التعبير الغير واعي وغالبا بعد كل مرة بتلون فيها بتحس براحة، مش عشان إنت ليوناردو دافنشى، ده لأن كل إللى شاغلك خرج مع الألوان، فببساطة بتستعيد نشاطك.
جرب تتوه
اختار طريق جديد للبيت أو جرب تركب إتوبيس ماتعرفش رايح فين. وإتحدى نفسك في إنك ترجع البيت. تحدى نفسك والتجربة الجديدية بتدى الواحد ثقة في نفسه و لو عنده مشكلة ما بيحس إنه قادر يتخطاها.
