لو عروسة.. إزاى تتفقوا على «فرش الشقة»؟
شقتك هى المكان اللي هتتولدي فيه من جديد وهتملي كل ركن فيه بذكريات، عشان كده لازم أنت وخطيبك تتفقوا على كل حاجة فيها لا أنتي تحكمي رأيك ولا هو، لأن انتو الإثنين اللي هتعيشوا في البيت فلازم يبقى فيه مزيج من روحكوا، واتفاقكوا ده طبعا هيبعد عنكوا مشاكل وخلافات كتيرة ممكن توصل أصلا انكم تسيبوا بعض وده هيكون بسبب تحكيم رأيكوا.
طب إيه هى الحاجات اللي المفروض تتفقوا عليها؟.. ده بقى السؤال اللي «شبابيك» هتجاوب عليه..
الاتفاق
أول ما أهلكوا يتفقوا إيه الحاجات اللي هيجبها عريسك وإيه الحاجات اللي المفروض عليكي تجبيها، شوفي إيه اللي ناقصك من الحاجة ديه وإيه اللي هتجبيه.. وانت كمان شوف ميزانية الحاجة اللي اتفقت عليها هتكون في حدود كام وشوف معاك كام وناقص ليك كام.. وإذا كنت عامل جمعية هتستلمها امتى أو لو عايز تدخل جمعية دور على جمعية تستلم فلوسها في وقت قصير.
الذوق
عرفوا ذوق بعض بتحبوا إيه المودرن ولا الكلاسيك.. الألوان الفاتحة ولا الغامقة.. طب لو شقتكوا صغيرة هتعملوا ألوان فاتحة توسعها ولا فاتحة مع غامقة.. ولو شقتكوا كبيرة هتستغلوا المساحات اللي فيها إزاي.. كل الحاجات ديه مفروض تتكلموا فيها عشان توصلوا لنقطة تلاقي بين أذواقكم انتوا الإتنين.
الفرجة
اتفرجوا على مواقع على الإنترنت أو مجلات خاصة بديكورات البيت يكون فيها أشكال مختلفة من الحاجات اللي عايزين تفرشوا بيها شقتكوا بحيث لما تنزلوا تشتروا يكون عندكوا خلفية عن الحاجات وأشكالها وأسعارها ولو حصل ان في حاجة من اللي انتوا عايزينها ملقيتوهاش وانتوا بتدوروا، يعني مثلاً لو كانت الحاجة ديه الصالون ممكن تدوروا على ناس بيعملوا صالونات و تقولوا ليهم انتوا عايزين ايه وهما يعملوا ليكوا الشكل اللي عايزينوا.
التدوير
هل خطيبك عنده طول بال إنه ينزل معاكي وتنقوا سوا ولا يحب إنك تختاري وتقوليله اللي اختارتيه وتتفقوا مع بعض على الحاجات.. وطبعا النقطة ديه هتخليكي مطمنة إنك مش عاملة على خطيبك ضغط عصبي في إنك تقوليله إنزل معايا دور معايا وهو ممكن يكون من جواه مش من النوع اللي بيحب ينزل بس هو بينزل عشان خاطرك.
الفلوس
لازم تعرفي هو عامل حسابه على كام.. وقدرته إيه.. عشان تعرفي تختاري الحاجة في حدود قدراته المادية.. وديه حاجة مهمة جدا لازم تتناقشوا فيها عشان لو وصلتوا لاتفاق إنك تنزلي تدوري متجبيش حاجة غالية.. وتنقي الحاجة اللي تناسب إمكانياته
