«حلال المشاكل» في الكلية.. خليك معاه
كل يوم في الكلية من سنة أولى لحد ما نتخرج بنواجه مشاكل كتير زي الحضور والغياب، أعمال السنة، توتر علاقة مع الدكتور، مش عارفيين نذاكر إزاي، وغيرها من المشاكل والعقبات الكتير.. لكن يا ترى تعرف أن للمشاكل دي «حلّال» بس في كتير من الطلاب مش واخدين بالهم منه.
هنعرفكم في التقرير ده مين «حلال المشاكل» اللي هيساعدكو في الجامعة، وهنعرفكم كمان إيه المشاكل اللي بيحلها.
مين هو «حلال المشاكل»؟
حلال المشاكل في الجامعة بالنسبة للطلاب في الغالب هو المعيد، وهو طالب مجتهد ذاكر أربع سنين كلية وأتعين في الخامسة معيد يعني هو مش شخص هيتمنظر عليك أو يحسسك إنك أقل منه لأن ببساطة أنت ممكن تكون زميله السنة الجايه. طبعا في نسبة من المعيدين مش بتساعد حد وبيقتصر دورها على الشرح في السكشن وبعدها تختفي، لكن الأغلبية هما حلالين المشاكل.
المعيد ممكن يعمل إيه؟
- لو مش عارف تظبط حضورك وغيابك لأي سبب، ممكن تشرح للمعيد مشكلتك وهو بيقدر الظروف هيحاول يوصل معاك لحل وسط ويقلل نسبة غيابك لو كلفك ببحث أو أسيمنت درجاته تشيل درجات الغياب.
- مش عارف تذاكر.. تفتكر مين ممكن يساعدك تذاكر أي مادة صعبة وكبيرة غير المعيد المسؤول عنها، وإللي طبعا هو ذاكرها قبلك، جرب وروح للمعيد وأسأله أذاكر المادة إزاي هيعرفك الطريقة المختصرة ويسهلها عليك.
- أوقات كتير ممكن تتوتر العلاقة بينا وبين الدكتور لأي سبب ما وعشان كده المعيد هو حلقة الوصل الوحيدة إللي تصلح العلاقة ديه.
- أعمال السنة، مشكلة أغلب الطلاب وقبل امتحان الفاينال بنحاول على الأقل نضمن نص الدرجات ديه، وعشان نضمن أعمال السنة لأزم نكون مقفلين كل الأبحاث ودرجات الحضور مظبوطه.. يعني في أيد المعيد
- لو الدكتور مش بيعرف يشرح، أو في مسألة أو جزء معين صعب فهمه مين هيفهمك غير المعيد.
- المعيد ممكن يكون وسطتك في أي مشكلة تقابلها في الجامعة من أول موظف الشئون لحد رئيس الجامعة نفسه
نصيحة أخيرة
حافظ على العلاقة الحلوة بينك وبين المعيدين والدكاتره مش شرط عشان مصلحتك يبقي تصاحب المعيد وتقول كلمتين حلوين في حقه ، بس خلي بالك إن المعيد ده ممكن يحل مشاكل في الكلية ويساعدك على تكوين علاقات طيبة تنفعك في حياتك العملية بعد كده أو ممكن يكون زميلك لو جبت امتياز.
اقرأ أيضا:
