شلل في المعدة بسبب التخسيس.. إدوارد يعاني أزمة صحية

أعلن الممثل إدوارد معاناته من أزمة صحية بسبب اللجوء لطريقة جديدة منتشرة للعلاج من مرض السمنة.

مرض إدوارد بسبب حقن التخسيس

كتب إدوارد، عبر حسابه على تطبيق تبادل الصور ومقاطع الفيديو «إنستجرام»: «كلام مهم جدا، أنا كنت باخد حقن التخسيس تحت إشراف دكتور تغذية ونزلت حوالي 15 كيلو، كنت باخد حقن، ودي الدكتورة نصحتني بيها، بس مشكلتها بتتاخد كل يوم في المعدة بس ميزتها إننا نقدر نتحكم في الجرعات عشان منتعبش، ووصلت الوزن اللي أنا عاوزه ودخلنا في مرحلة التثبيت».

وأضاف إدوارد: «الدكتورة طلبت مني أروح لدكتور جهاز هضمي أعمل تحاليل ونطمن بس أنا طنشت وقولتلها أنا هاخد حقن أسبوعية بدل اليومية عشان تعبت من كل يوم حقنة لمدة 5 أسابيع، وكانت تمام معايا وكانت برضه دكتورة التغذية بتسألني على التحاليل كل فترة وكنت بطنش لإني تمام مش حاسس بحاجة، وكمان لا كنت بتخن ولا بخس وباكل عادي طبعا برضه».

وواصل: «فضلت مواظب على دايت مع الدكتورة لحد الأسبوع اللي فات فجأة مش جعان خالص وقعدت حوالي 4 أيام مش بدخل حمام ولا قادر أكل ووجع في معدتي جامد، ودكتورة التغذية قالتلي وقف الحقن وروح لدكتور جهاز هضمي فورا وعملت كده روحت لدكتور قالي حصلي شلل مؤقت من الحقن في المعدة وكان مفروض تتابع معايا مع دكتورة التغذية قولتله أنا اللي كنت بطنش عشان كنت تمام، قالي الحقن مش وحشة مفعولها كويس، بس أنا بنصح أقصاها 3 شهور بس تاخذها وتوقف فترة وترجع تاني، بس لازم طبعا برده متابعة مع دكتور تغذية».

وكشف إدوارد أنه يواصل العلاج من هذه الحالة، مشيرا أن الطبيب المعالج طمأنه بعودة عمل المعدة خلال مدة تصل إلى 9 أيام.

ونصح إدوارد متابعيه ممن يتجهون لإنقاص الوزن باستخدام الحقن بالمتابعة مع طبيب جهاز هضمي ومتخصص في أمراض القلب.

​​​​​​​