التمويل العقاري وامتلاك «شقة الزوجية»
كلنا بندور على شقق عشان الجواز، وتقريبا هي الشيء اللي بتتحكم في توقيت الارتباط، وموافقة أهل البنت اللي اخترتها، ولأن الإيجارات مرتفعة ومش لاقين شقة، هنقولكم على بعض الخيارات المتاحة وتم تنفيذها من بعض الناس لحل الأزمة.
التمويل العقاري
هي خدمة بتقدمها مجموعة من البنوك والشركات المصرية، مقابل بعض الضمانات، من خلالها بتدور على الشقة اللي أنت عايزها بشرط تكون في عقار مسجل قانونيا.
بتتفق مع مالك الشقة وتخطر البنك بالعنوان وبيدفعلك 90% من الثمن، ويسترجعها عن طريق أقساط شهرية بيتم الاتفاق عليها وعلى فترات ممكن توصل 20 سنة، ويستحق الانتفاع بالمشروع كل مواطن مصري أعزب لا يزيد دخله عن 2250جنيه في الشهر أو 3000 جنيه للمتزوج (دخل الأسرة)
* لازم تكون لديك مفرددات مرتب من جهة حوكمية أو خاصة
* تقدر تضم مرتبك على مرتب زوجتك لو أنت متجوز عشان تقدروا تشتروا حاجة كويسة
* القسط مينفعش في حال من الأحوال يزيد عن 35% من مرتبك.
* البنك هو اللي هيتولى تقييم الشقة والاتفاق وسداد المبلغ، وهتضمن إنك هتدفع تمنها الفعلي.
راجع الرابط: http://www.mff.gov.eg/site/faq.aspx
ودي قايمة بأفضل 5 مصادر للتمويل العقاري في مصر: بنك مصر - المصرف المتحد - البنك الأهلي سوسيتيه جنرال - شركة البنك الأهلي للتمويل العقاري - البنك العقاري المصري .
البنك أو الشركة مش بيشترط عليك إنه يمولك 90%، هو بيترك الخيار في النسبة اللي هيشارك بيها معاك، زي ما بتتحددها.
اتحاد الملاك
هتجمع 20 شخصا ممكن يكون أصحابك أو زمايلك في الشغل وتشترو قطعة أرض تبنو عليها عمارة (12) دور على الأقل.
كل واحد هيدفع 25 ألف في الأول وهيكون المجموع (نص مليون)، هيشترو قطعة أرض في منطقة كويسة سعر المتر فيها لا يتجاوز 6 آلاف، ومتاح يتبنى فيها عمارة كبيرة.
كل واحد هيدفع 25 ألف تاني (نص مليون) ويبنو الدور الأول، ويبيعو شقتين فيه، واللي هيوصل تمنهم وقتها (300) ألف جنيه . ده تمن الشقتين قبل ما يتبنو في المنطقة
بكده هيكون معانا 300 ألف + نص مليون (الـ25 ألف التانيين) = 800 ألف.. يطلعو بالعمارة.
لو احتاجوا فلوس تاني يبيعو شقتين تاني + محلات الأرضي (نص مليون) تقريبا
مهم جدا ياخدو بالهم من من فكرة ترخيص العمارة أو الكهرباء ( 25 ألف تاني من كل واحد).. وأي زيادة تاني برضو مش هتكون اكتر من 25 ألف.
الفكرة هتخليك تشتري شقة مضمونة وفي مكان كويس ده غير الوسط اللي كله أصحابك وناس بتثق فيها بـ 20 ألف جنيه بس .
الفكرة مجنونة، بس عايزة ناس مجانين وقادرين يعملوا ده.
