للبنات «اللي ملهمش فيها».. معلومات مهمة عن كرة القدم

الإحصائيات بتقول إن حوالي 60 مليون مصري مهتمين بكرة القدم، يعني ما بين كل 2 هتلاقي واحد بيشجع كورة. يعني وارد جدًا تتجوزي حد له فيها، لازم تعرفي إن كل حاجة في الكورة ليها معنى، واهتمام الراجل بالكورة، حتى لو مش بيمارسها، ميفرقش كتير عن اهتمامك بآخر خيوط الموضة، والماتش بالنسباله مينفعش يتفوت، زي حلقة المسلسل التركي أو الكوري بالنسبالك بالظبط.

الكورة لعبة بسيطة، ومصدر دخل لملايين من الناس، واللاعبية دول مش تافهين بيموتوا بعض عشان كورة، هما بس ناس عندهم مهارة في حاجة معينة بيحبوها وبيلعبوها مع بعض، وهي كرة القدم.

 يعني ايه كورة؟

مش مجرد، ناس بتجري ورا كورة جلد وخلاص زي ما انتي فاهمة واللي يجيب جون يفوز، دي رياضة ليها قوانين، وأفضل من أي لعبة ممكن تروحي تشتركي فيها عشان تنزلي وزنك، لأن لاعب كرة القدم بيخسر حوالي 3100 – 3200 سعرة حرارية في الماتش الواحد، غير إنها من الألعاب الوحيدة اللي بتشتغل على على كل عضلات الجسم وبتقوي عضلة القلب.

حتى الجلد المدور ده "الكورة" له مواصفات وزن وشكل وحجم وضغط هوا معين وموحد في كل العالم، مينفعش يتغير، زي الوزن (410 - 450) جرام، والحجم (من 68 لـ 70) سم، وضغط الهواء (0.6 - 1.1) ضغط جوي.

القوانين

الملعب ده مش نجيلة خضرا، ده له شكل محدد في العالم كله، وله أحجام وأبعاد معينة، في ملاعب صغيرة وملاعب أكبر، الأبعاد ثابتة.

عندك أصحاب كتير؟ يوم فرحك بتختاري منهم 20 واحدة بس تعزميهم، برضو كل فريق عنده لعيبة كتير، بس في كل بطولة له الحق يسجل 25 أو 30 لعيب منهم بس، على حسب قواعد الاتحاد المُنظّم لمسابقات الكورة.

من الـ20 أصحابك دول، في كام واحدة بيكونوا "Bridemaides" يلبسوا نفس اللون، في الكورة المدير الفني "واحد متعصب طول الوقت واقف برة يتنطط" بيختار 11 لعيب يبدأ بيهم الماتش، وخلال الماتش ممكن يطلّع منهم 3، وينزل غيرهم، حسب ما الماتش محتاج.

الفاول

دي لعبة رياضية بتحكمها قوانين، ومينفعش حد يرتكب خطأ ضد التاني. زي ما في هزار بينك انتي واصحابك ممكن تعديه وتضحكي عليه، بس لمّا واحدة فيهم تزودها تتقمصي، الكورة برضو مسموح فيها بالاحتكاكات الطبيعية، في واحد بيجري ورا اللعيبة طول الماتش لابس لون فاقع غالبًا "أصفر أو أحمر" اسمه الحكم، ده شايل صفارة ودفتر صغير كدة، ولما حد من اللعيبة "يتغاشم" ويدخل على الكورة جامد، فيضرب حد من اللاعيبة، بيصفر ويحسب عقوبة اسمها (فاول) أو مخالفة، كعقاب على غباوة اللاعب، ولو اللعيب "غشيم" قوي، بيطلعله كارت لونه أصفر، وده أوّل تحذير، لو كررها بياخد استمارة 6 أو "الكارت الأحمر"، يعني ياخد بعضه ويخرج برة، ومحدش بيدخل مكانه.

تبديل الملعب

وانتي بتتفرجي في الشوط الأول هتلاقي الفريق الأصفر بيلعب على يمينك، وفي الشوط التاني هتلاقيه جه على شمالك، ده بيبقى "تبديل الملعب" عشان تكافؤ الفرص. كل فريق بياخد فرصته في كل مرمى عشان اتجاهات الرياح وانعكاسات الشمس في عنيهم.

زي ما تتصوري سيلفي مع صاحبتك، وتبدلوا الأماكن عشان الكاميرا بتخلي الأقرب «أوحش».

حكم الراية

تحت خالص، وفوق خالص، هتلاقي اتنين لابسين زي الحكم "اللي بيجري ورا اللعيبة في الملعب"، وماسكين في ايديهم أعلام ملونة، وكل شوية يرفعوها والحكم يصفر وراهم، دول مُساعدين الحكم، كل وظيفتهم أنهم ينبهوا الحكم «اللي في الملعب» للمخالفات اللي مش بيشوفها «هيعمل ايه ولا ايه الراجل؟»

كلمة «تسلل» هتسمعيها كتير وانتي قاعدة جنب جوزك، بدل ما تسأليه يعني ايه وبرضو متفهميش في الآخر، التسلل ده زي بالظبط في فرحك لمّا واحدة صاحبتك وقفت وراكي أقرب من كل البنات عشان "تلقف" البوكيه، بدل ما توقف معاهم. هو ده التسلل، أن اللعيب يسيب كل اللعيبة التانين ويوقف لوحده أقرب لجون الفريق المنافس وقت لعب الكورة ليه من دفاع الفريق الخصم عشان يجيب جون لوحده.

الركنية

الملعب، زي ما انتي شايفة، في خطوط بيضا كتير، اللي في النص ده اسمه خط نص الملعب، بيقسم الملعب نصين، نص لكل فريق "قسمة العدل". الخطوط على الجانبين دول بيحددوا للعيبة تلعب فين، زي الـ"eyeliner" كدة، مينفعش تخرجي عن العين، همّا مينفعش يخرجوا عنهم. لو الكورة خرجت من الخطين دول بيبقى اسمها "أوت"، يعني اللعيب يشيل الكورة بإيده، ويلعبها من برة. أمّا بقى لو الكورة خرجت من الخطين اللي جنب الجون، بيبقى اسمها ركنية، بيلعبها اللعيب من النص دايرة اللي جنب العلم في الكورنر كدة، برجله بقى المرة دي.

لون الفريق

كل فريق له لون، اللون ده بيلبسه في كل الماتشات، احفظي أن الأهلي لونه أحمر والزمالك أبيض، برشلونة أحمر في أزرق وربال مدريد أبيض. غالبًا جوزك هيكون بيشجع اتنين من دول. ممكن تلاقي الأهلي لابس أزرق، أو الزمالك لابس أزرق عادي، ده معناه أن الفرقة التانية لابسة لون الفريق الأصلي. زي ما انتي بتغيري هدومك لو لقيتي حد لابس زيك، بس في الكورة مش بتكون "نفسنة"، ده عشان الجمهور والحكم يعرف يفرق بين الفرقتين.

أمّا بقى لو القدر اضطرك تتفرجي على ماتش متعرفيش فيه لون الفرقة، بصي على الشعار اللي مكتوب عليه اسم النادي، على الكتف الشمال جنب القلب، وهتلاقي نفس ألوانه هي بالظبط ألوان الفريق اللي بيلعب.