دليلك لشراء جهاز موبايل جديد
أي حد فينا لما بيروح يشتري موبايل، يبص على الشكل ويفتح التليفون يتفرج وهو مش عارف بيعمل أيه، وفيه حد يشغل أغنية يجرب الصوت والناصح بياخد صورة كده يجرب بيها الكاميرا.
في حاجات مهمة لازم تاخد بالك منها وانت بتشتري تليفون، خطوات هنقولك عليها والناس تحس إنك فاهم مش بتشتري وخلاص.
تجيبه منين
كل الموبايلات واحد في كل الأماكن، والسعر في توكيل سامسونج هو نفس سعر الموبايل في شارع عبد العزيز، ولو لقيته بسعر أقل هنا تقلق أكتر لأن فيه بعض الحاجات بتتغير، زي "الهاند فري"، الشاحن، ومن غير ضمان.
لو مفيش توكيل قريب، روح لمكان يكون له اسم ومعروف، ويفضل توكيلات الاجهزة زي "بي تك" أو "راية" .
القيمة
مفيش موبايل بجودة كاميرا عالية وسريع ودقة شاشة كبيرة وبطارية تعيش وبسعر قليل، كل حاجة وليها تمنها وسعرها اللي بيتحدد حسب مواصفاتها.
حدد ميزانيتك وقيمة وإمكانيات الموبايل اللي عايز تجيبه، واسأل في الحدود دي .
المميزات
أول ما تروح تشتري تليفون لازم تعرف الحاجات دي .
1_ إمكانيات الجهاز: الإنترنت وتطبيقات الألعاب عالية الجودة بقت شىء أساسي في أي موبايل، يبقى هتسأل على "البروسيسور" وعلى الأقل لازم يكون 1 جيجا، و"رامات" 1 جيجا برضو.
دول الحاجتين الأساسيتين اللي بيحددوا سعر الموبايل، وكل ما يزيدوا السعر بيعلى، وامكانيات التليفون من دقة كاميرا وشاشة وسعة تخزين بتزيد برضو.
السعر في حالة الامكانيات دي هيكون في حدود 1250 حتى 2000، حسب ماركة ونوع التليفون.
التخزين
"كارت الميموري" حاجة مضافة لأي تليفون ولازم تكون موجودة ومتعتبرش ميزة تتكلم فيها، وبيبقى فيه سعة تخزين داخلية، هتلاقي من (2جيجا) لحد (64 جيجا) وفيه أكتر لكن اسعارها بتبقى عالية جداً.
كل ما البروسيسور والرامات زادت، زاد معاها ذاكرة التخزين الداخلية وسعر التليفون كمان.
لو شغلك رسايل وتصفح مواقع إلكترونية واستعمال البريد الإلكتروني، يبقى ذاكرة داخلية (4 جيجا) هيبقى كويس، أما تطبيقات ألعاب وفيديو، ومشاهدة أونلاين واستخدام شبكة إنتر نت دايماً، يبقى متدورش على تليفون ذاكرته الداخليه أقل من (8 جيجا).
المشغل
فيه 3 مشغلين رئيسيين للموبايل (ويندوز_ أندرويد_ أبل)
-أندرويد هو أكتر مشغل منتشر ومستخدم ولمعرفة كل شىء عن نظام التشغيل أندرويد اضغط هنــا
- ويندوز خدمة أطلقتها شركة مايكروسوفت، ولأن أسلوبها بيشبه إلى حد كبير نظام الكومبيوتر، بيعتمد عليه كل أصحاب الأعمال والوظائف اللي بتحتاج لأعمال مكتبية كتير.
- IOS اللي بتقدمه شركة أبل، وبيشغل كل أجهزة "أي فون"، نظام قوي وبيعتمد على الدقة والسرعة، ومتطور أكتر من النظامين السابقين لكنه مش متنوع زي أندرويد والأجهزة اللي بتعتمد عليه قيمتها عالية.
الشاشة
استخدامك هيحدد حجم شاشتك، كمان تقبلك للجهاز وحجمة في إيدك.
زيادة حجم الشاشة مع ضعف الامكانيات بيأثر على جودة الصور والفيديوهات وطريقة العرض
شاشة أي تليفون من 4 إلى 6 بوصة، لو زادت تبقى تابلت، شاشة إتش دي بمقاييس 768×136 هي الحد المعقول للجودة والدقة، أما الشاشات الإتش دي كامل بمقاييس 1080×1920 والمستخدمة مع معظم الأجهزة.
لمعرفة أكثر عن شاشات الهاتف اضغط هنـا
الكاميرا
مش كل حاجة في التليفون، هي حاجة بتختلف على حسب امكانيات الموبايل كاملة، ممكن تجيب حاجة بكاميرا كويسة ولكن دقة الشاشاة والرامات ضعيفة، هتلاقي جودة الصور قليلة.
وبتقاس جودتها بالميجا بيكسل، وبتبدأ في كل الموبايلات دلوقتي من 5 MB، وبتزيد جودة الصورة كل ما زات عدد الميجا بيكسل.
ولاز تتأكد من حجم الكاميرا الأمامية، والأهم إنك توازن بين حجم الشاشة والكاميرا عشان توصل لأفضل جودة للصور والفيديوهات.
أما الفلاش لازم تتأكد إنه بخاصية LED.
أولاً لازم تسأل على المعالج (البروسيسور) وبعده الرامات والذاكرة الداخلية، ثم دقة الشاشة وحجم الكاميرا. انتظرونا مع أفضل أنواع الموبايلات وخطط أسعارها على حسب امكانياتك المادية.
