رغدة جلال الدين تكتب: خرافات لازم نحدفها من الشباك

من أول ما وعينا على الدنيا بنسمع حوالينا كلام من أهالينا ورثوه عن أهلهم، الكلام ده مش بس وقفنا على إننا نسمعه ده إحنا بقينا بنردده زيهم وزودنا عليه كلام جديد، رغم إننا متأكدناش من صحته، واقترابه إلى الخيال بل التخاريف. مع مرور الوقت الواحد عقله تفتح أكثر، وبقى على يقين أن هناك معتقدات وتصنيفات تم زرعها فينا بناء على الموروث الثقافي، لا تعبر إلا عن تخاريف لازم نحدفها من الشباك. معتقدات خاطئة

• القطة السوداء: يالهوي ده فيها جن اجري من قدامها أحسن تلبسك، ده معتقد من المعتقدات اللي كانوا بيخوفونا بيها، لكن المصريين جبابرة قدرنا نخليه معتقد إحنا اللي نرعب بيه القطط السوداء، لما بيبقوا واقفين مبحلقين شايفنا بنجري منهم هما اللي بيترعبوا.
• الضحك قلة أدب وبيجيب المصايب: بعد الضحك ده أكيد هتحصل مصيبة، بتضحكي من غير سبب يا قليلة الأدب، معتقدين ظلموا بيهم الضحك في مجتمعنا وربطوه إن لما نضحك هتحصل مصيبة، ولو حصلت مصيبة فعلاً يقولوا صدقتوا كلامنا، مع إن حصول المصيبة من عدمها ديه حاجة بتاعت ربنا ملهاش علاقة بالضحك، وبسبب الكلام ده الناس بقت تخاف تضحك من قلبها عشان المصيبة متكونش كبيرة، وكمان ربطوه بإن الشخص لما بيضحك من غير سبب يبقى قليل الأدب، طب وهو عمل إيه عشان يبقى قليل الأدب!!.. ضحك بس.
• بنت شمال متأخرة: شوفي راجعة متأخر إزاي ديه شكلها شمال، ديه بقى حاجة متخلفة جدا أي بنت راجعة بيتها متأخر تبقى شمال في نظر المجتمع، ولو حصل إن حد تحرش بيها أو اغتصبها تبقى هى السبب لأنها راجعة متأخر، مع إنها ممكن تكون بتشتغل أو في درس أو عند صاجبتها أو أيا كان هى فين برضه بتبقى في نظر الناس  شمال.
• واد بضفيرة: ده واد صايع شوفي مطول شعره إزاي، معتقد زي بتاع البنت الشمال كده، يعني لو واحد مطول شعره مش معناه إنه صايع ديه حرية شخصية مليش إني اشتمه أو اقول عليه حاجة يمكن أحسن مننا.
• معمولها عمل: متجوزتش لحد دلوقت أكيد معمولها عمل، ده بقى المعتقد اللي بتوهم بيه الأهالي نفسها وبيقعدوا يدوروا على دجالين عشان يفكوا العمل اللي معمول لبنتهم، مش بيراعوا إن البنت احتمال كبير تنهار نفسيا من اللي بيعملوه فيها، طبعا أهلها مش حاطين في بالهم إن الموضوع قدر وكل شيء بميعاد والحاجات ديه، هما خلاص شايفين إنه عمل ولازم سيدي بعرور يفكه.
• التخينة يع: ديه تخينة يا أبني هتجوزها إزاي، ناس كتير معتقدين إن التخينة ديه مينفعش تتجوز وتروح تدفن نفسها في أي حتة، لأن مفيش راجل هيبصلها ولازم تبقى سمباتيك عشان تلفت نظر الرجالة، ده طبعا كلام كفتة لأنهم بيظلموا إنسانة ملهاش ذنب في جسمها وسهل جدا تخس وتبقى سمباتيك بس مش عشان كلامهم السم ليها ده عشان هى عندها إرادة وتقدر تخسر وزنها بكل سهولة.

• إرهابي: المجتمع بقى يصنف أي حد بدقن بأنه إرهابي، مع إن ديه سُنة رسول الله "صلى الله عليه وسلم"، ومش مقياس أبدا إن الشخص ده إرهابي، غير إن الإرهاب لا علاقة له بالدين ولا بالجنس، العنف منتشر في كل المجتمعات، لكن لأ ده بدقن يبقي مخبي فيها قنبلة.
• أجنبية.. حلال فيها: ناس كتير بتصنف الأجنبية على إنها جماد حلال فيها التحرش والضرب والشتيمة، مع إنها إنسانة زيها زينا ولو جربنا نتكلم معاها هنلاقيها بتحب المصريين وعاداتهم وتقاليدهم، لكن الموروث الثقافي كان ليه الفضل في ده.
• البشرة السوداء: ناس كتير جداً بتصنف ذوات البشرة السوداء على أنهم كائنات غريبة، وبتعاملهم كأنهم عدو جاي يحتل بلدنا، وده بيظهر في المواصلات العامة خاصة المترو، أول ما الناس تشوف أفارقة داخلين يركبوا يبدأ البص والكلام عليهم وتظهر على ملامح الأفارقة نظرة استغراب من نظرة المصريين وتعاملهم معاهم.
• مش محجبة تبقى مسيحية: أي بنت مش محجبة الناس على طول بيصنفوها إنها مسيحية، ويسألوها أنت مسيحية؟.. إحنا مالنا ومال دينها إيه علاقته بشكلها.