لو عايزة تخسي.. جربي «الزومبا»
الرقص حاجة ممتعة جدا، دا غير إنه نوع من أنواع الفن وليه فوايد كتير جدا. لو بتحبي الرقص،أو الرياضة، يبقى لازم تجربي «الزومبا»، لأنها مش بس هتساعدك انك تخسي، لا كمان هتنبسطي جدا وتديكي طاقة ايجابية .
هي إيه الـ«الزومبا»؟
الزومبا هي برنامج لياقة بدنية كولومبي ابتكره «بيتو بيريز» في التسعينات ومستوحى من الرقص اللاتيني، (السالسا، الريغيتون، مامبو، رومبا، المرينغة، الايروبيكس، الهيب هوب، والبيلى دانس) ، الزومبا بتجمع حركات من كل الرقصات دي.
والمميز في «الزومبا» أنها بتبدأ بحركات وموسيقى هادية، بعدين تبدأ بالتصاعد تدريجياً مع زيادة سرعة الحركات وحماسة المتدربات، وليها أنواع كتير زي زومبا أكوا الخاصة بحمامات السباحة، و«زومبا جولد» المخصصة لكبار السن، و«زومبا كيدز» المخصصة للأطفال.
الـ«الزومبا» في مصر
«الزومبا» انتشرت مؤخرا في مصر، وفي اماكن كتير دلوقتي بتنظم ايفنتات زومبا دعما لمؤسسات خيرية بحيث يكون العائد من تنظيم الإيفينت رايح للمؤسسات دي زي المؤسسة المصرية لمكافحة سرطان الثدي، وفي معظم الأوقات بيبقي ممنوع أن أي بنت تصور نفسها أو الي حواليها لأن غالبا «الزومبا» بتبقي لمة ستات وبنات بس. ولازم وانتي بتلعبي تكوني لابسة ملابس رياضية تساعدك على الحركة براحتك.
لو جربتي حاجات كتير عشان تخسي ومجابتش نتيجة جربي «الزومبا» ومش هتندمي، لما ترقصي «زومبا» هتحرقي سعرات حرارية كتير دا غير ان ليها فوايد تانية كتير :
- تنشيط الدورة الدموية
- شد عضلات البطن والأذرع والأرداف
- مفيدة للقلب والأوعية الدموية
- هتحسن من صحتك بشكل عام.
الزومبا مش شرط تلعبيها في مركز رياضي أو حتي مع صحابك، ممكن ببساطة تشغلي المزيكا الي بتحبيها وتفتحي أي فيديو لمدربات «الزومبا» على موقع «youtube» يوتيوب وبكدا تبقي وفرتي فلوس الجيم، لكن دا ميمنعش أن لما يبقي حواليكي بنات كتير كلهم بيرقصو دا هيديكي طاقة إيجابية عالية جدا غير لما تكوني في البيت لوحدك.
*لو بتفكري تجربي الزومبا لوحدك جبنالك فيديوهات تساعدك :
*أما لو حابة انك ترقصي مع بنات كتير حواليكي بيرقصو ممكن تروحي ايفينت يوم السبت الي جاي 12 ديسمبر برعاية الجمعية المصرية لصحة المرأة في الزمالك، عائد اليوم هيكون للجمعية المصرية لصحة المرأة وهيستخدم لمعالجة البنات اللي أتعرضوا لعنف و التوعية بصحة المرأة
شوفي الايفينت من هنا
ودا موقع مخصص لتمارين الزومبا ممكن تدوري فيه على أقرب مكان ليكي في المحافظة بتاعتك و تختاري المواعيد الي تناسبك Zumba Egypt
