الأهلي: اشترك في عضوية النادي قبل زيادة الأسعار.. ومشجعين: احنا شاحتين اشتراك الباقة
أعلن النادي الأهلي عن إتاحة الفرصة للاشتراك في عضوية فروع النادي، مشيرا إلى وجود فرصة أخيرة قبل زيادة الأسعار.
اشتراك النادي الأهلي
ونشر النادي الأهلي عبر صفحته الرسمية على موقع التواصل الاجتماعي فيس بوك عن إتاحة الفرصة للاشتراك في عضوية النادي بمختلف فروعه.
وكتب الأهلي في المنشور: متفوتش الفرصة و انضم الى عائلة النادي الاهلي.
وتابع: باقي أماكن محدودة، اشترك في عضوية النادي الأهلي قبل زيادة الأسعار في 30/6/2025.
واختتم: للاستفسار اتصل على 101907 أو زور اقرب فرع.
ولاقى المنشور تعليقات مختلفة لجماهير ومحبي الأهلي، حيث دعم البعض هذا المنشور بينما سخر منه البعض الآخر.
وكتب أحد المشجعين: يا جدعان طلما مش بتدور على عضويه الاهلي ومكتفي بتشجيعك للكيان زيي كده
يبقى ملهوش لازمه أن حضرتك تقول هو احنا لاقيين
الصفحه بتخاطب اللي عنده المقدره أنه يدفع وياخد عضويه الاهلي.
وتابع: وانا لو ربنا اكرمني وجاتلي فرصه زي دي اني اخد عضويه الاهلي اكيد هعمل كده لان عارف ومتأكد أن الفلوس دي هتتصرف في المكان الصح.
بينما علق آخر ساخرا: سعر العضوية كام ارجو عدم الرد، وكتب مشجع آخر: ليه مايبقاش في تذكرة للجمهور لزيارة النادي لغير الاعضاء لمدة يوم تتحدد بساعات معينة، عشاق الاهلي كتير بس مش كله يقدر يشترك، اعملو حاجة للجمهور البسيط اللي زي حالتنا والله هتفرحونا وفي نفس الوقت يبقى مصدر دخل جديد للنادي.
ويمتلك النادي الأهلي 4 فروع في مختلف محافظات الجمهورية، الأول هو مقر الأهلي الرئيسي في الجزيرة، بينما الثاني في مدينة نصر، والفرع الثالث بالشيخ زايد والرابع بالتجمع الخامس.
