«طريق السعادة» يبدأ من هنا

الصحة النفسية والعقلية مش معناها انت حاسس بايه دلوقتي و مبسوط ولا زعلان، صحتك النفسية بتمثل جزء كامل من شخصيتك وتكوينك، يعني الطريقة الي بتفكر بيها، وقدرتك على التحكم في أعصابك، وازاي بتتعامل مع الضغوط والمشاكل في حياتك.

اهتمامك بصحتك النفسية مش شرط يكون بإنك تروح لدكتور نفسي، طبعا دا ممكن يكون ضروري في بعض الأحيان، بس انت كمان ممكن تهتم بصحتك وتبدأ تاخد خطواتك لتحسينها باستمرار.

اهتمامك بنفسيتك هيخليك أحسن في كل المجالات، في علاقاتك وشغلك ومستقبلك عامة،و هتساعدك تكون شخص أكثر إيجابية وواقعية في نفس الوقت.

• قول لنفسك كلام إيجابي

رأيك في نفسك ليه تأثير كبير جدا على صحتك النفسية، و لما تفكر تفكير سلبي في نفسك أو في ظروفك، دا هينعكس على أي حاجة تانية هتفكر فيها.

خلي حوارك الداخلي بكلمات إيجابية، ومتبقاش قاسي على نفسك في الكلام، مثلا بدل ما تقول لنفسك: «أنا بهدلت الدنيا في الإنترفيو، أنا أكيد مش هتعين"، ممكن تفكر بطريقة تانية زي مثلا: "صحيح أنا معملتش أحسن حاجة عندي في الإنترفيو، بس دا مش معناه اني مش هتقبل».

• اكتب الحاجات الحلوة في حياتك

الامتنان أحد الأسباب الرئيسية للسعادة، وفي دراسة بتقول إن الأشخاص الأكثر امتنانا في حياتهم هم أكثر سعادة، كل يوم هات ورقة وقلم واكتب الحاجات الحلوة في حياتك أو في يومك، ولما تكون متضايق طلع الورق بص عليه.

•  ركز على حاجة واحدة بس

قاعدة مهمة في التفكير، أنك في كل مرة تفكر في حاجة واحدة بس وتركز عليها، لأن التشتت شيء سيء للغاية، وهيخليك مش سعيد في أي حاجة بتعملها.

عيش اللحظة اللي أنت فيها دلوقتي، ومتضيعش وقتك في التفكير في اللي فات أو اللي جاي، عشان أنت كده بتضيع اللحظة اللي أنت فيها.

• مارس الرياضة

الرياضة بتخلص الجسم من التوتر والدهون الزائدة، وبتساعد على فرز الأندروفين اللي بيحسن المزاج العام، عشان كده الرياضة مضاد طبيعي للاكتئاب.

الرياضة مش شرط تكون في المراكز الرياضية، المشي رياضة واليوجا رياضة و الجري رياضة، وفي تمارين كتير ممكن تعملها في البيت، لكن الأفضل انك تمارس الرياضة في مكان في الهواء الطلق والشمس، عشان أشعة الشمس هتساعد جسمك ينتج فيتامين د.

• اهتم بأكلك

نوعيات الأكل الي بتختارها بتأثر على مزاجك العام، وصحتك النفسية والجسدية، الكربوهيدرات( بكميات معقولة) بتزود نسبة السيروتونين في الجسم عشان يهديء المخ، والأطعمة الغنية بالبروتين بتزود ‘فراز الدوبامين والتيروزين اللي بتخليك أكثر إنتباها، والأطعمة الغنية بفتامين أوميجا 3 مهمة جدا زي السمك، والمكسرات، وزيت الزيتون.

• احكي المشاكل

اختار صديق موثوق فيه جدا أو حد متعرفهوش خالص، واحكيله المشاكل و الحاجات اللي مضايقاك، التواصل مع الآخرين مهم لتحقيق مستوي جيد من الصحة النفسيةو العقلية.

• ساعد الناس

الأبحاث بتقول أن مساعدة الناس بدون مقابل، بتديك شعور كويس تجاه نفسك، وبتخليك تفكر تجاه نفسك بشكل أكثر إيجابية، لما تعمل حاجة لحد وتحس أنك ليك قيمة بالنسبة له دا بيديك تقييم ذاتي أعلى لنفسك.

• استريح

متضغطش على نفسك في الشغل أو الأنشطة الاجتماعية أو التواصل الاجتماعي، لأن اي انسان بيحتاج بريك من وقت للتاني، مش لازم يكون لوقت طويل ،ممكن تاخد بريك دقيقة واحدة تاخد فيها نفس عميق (شهيق وتعد 4 دقايق بعدين زفير) ،لأن مهم تفصل شويا وترتاح.

• النوم

أبحاث كتير بتقول إن الحرمان من النوم ليه أضرار كتير جدا، حاول دايما تاخد كفايتك من النوم، و يكون أفضل لو تنام في أوقات محددة كل يوم.

أقفل الموبايل والكمبيوتر والأي باد وكل الأجهزة الإلكترونية قبل ما تنام بساعة مثلا، لأن في دراسة بتقول إن استخدام الأجهزة دي قبل النوم مباشرة بيقلل من استعداد المخ للاسترخاء والنوم.