«المسرح» طريق السينما والتليفزيون
كتير مننا بيحب التمثيل وشايف نفسه موهوب.. وبرضه كتير مننا اعتبر المراية مقياس لموهبته فكان بيقف قدامها يتقمص شخصية ممثل يقلده.. وفي الأخر يدي تحية للمراية من كتر إعجابه بأداءه وكأنها الجمهور.. بعد وقت بيبتدي الممثل يدور على مقياس تاني غير المراية يقيس بيه حجم موهبته وتمثيله بس ممكن ميعرفش يوصل للمكان الصح..
«شبابيك» قرر يحطك على أول الطريق.. وينصحك بالمشاركة في التمثيل على المسرح عن طريق التقديم في أي فرقة.. لأنه المكان الحقيقي اللي هتقدر تطلع فيه موهبتك.. وده لعدة أسباب هنسردها في السطور التالية..
الاتصال بالجمهور
لما تمثل على المسرح بتعرف على طول إذا كان تمثيلك حلو ولا وحش.. وده من خلال رد فعل الجمهور تجاهك.. إذا كان أدائك متميز هتلاقي الجمهور مبسوط وبيسقفلك.. كمان لو حسيت من تفاعل الجمهور إن أدائك مش واااو.. هتبدأ تطور نفسك وتضغظ عليها أكتر في البروفات عشان المرة الجاية لما تشارك على المسرح تقدر تبسط الجمهور.
مهارات تمثيل
ومن خلال الشغل والضغط على نفسك هتطلع كل المهارات والمواهب.. وهتتعرف على مهارات كتيرة هتدعم موهبتك وهتخليك مميز وليك طلة على خشبة المسرح وده بيخلي الجمهور مجرد ما تقول "بم" يسقفولك.
الثقة بالنفس
لما تسيب أثر عند جمهور المسرح ويبقوا مستنين ظهورك من كتر إعجابهم بيك.. ده بيديك ثقة كبيرة بنفسك و بموهبتك وبيخليك عايز تحافظ وتشتغل أكتر عشان كل مرة تطلع فيها على المسرح الجمهور يسقفلك ويبقى مبسوط منك.
المخرجين
موهبتك هتفتح ليك مجال واسع وهيشوفك مخرجين مسرح وسينما وتليفزيون.. بيبقوا متواجدين لانتقاء العناصر المميزة من على خشبة المسرح.. ومن هنا هيكون العين عليك والاختيار للمشاركة في الأعمال الفنية المختلفة.
بكده بدايتك في المسرح تبقى الخطوة الأولى والأصعب لأن الجمهور بيكون قدامك ورد فعله عليك في لحظتها.. الأمر ده هيخليك تقيل بعد كده لو اشتغلت سينما وتليفزيون.
