يعني ايه «برجوازية»؟.. ابسطهالك
كلام كتير بنسمعه ومبنبقاش فاهمين معناه.. بتبقى مصطلحات مُبهمة ومش عارفين المقصود بيها ايه بالظبط؟ بيبقي كلام كبير كدة وأنت مش فاهم إيه دة؟
الكلام الكبير دة له تاريخ وتفسير ومعنى. من النهاردة، وكل يوم هنتكلم عن مفاهيم وكلمات بنسمعها مش فاهمينها، ونبسطلك معناها.
والمرة دي هنتكلم عن "البرجوازية"، أصل الكلمة كان إيه؟ ومعناها إيه ببساطة شديدة؟ في فيلم اسمه "فوزية البرجوازية"، إنتاج 1985، بطولة إسعاد يونس وصلاح السعدني. إسعاد يونس "اللي هي فوزية" شخصية مُثقفة هي وجوزها، سكنوا في عمارة صاحبها عنده محل حلاقة.
"فوزية" في مرة بتنشر الغسيل وقع منها بنطلون على جيرانها اللي تحتها، فلمّا سألت على البنطلون، جارتها قالتلها موقعش عندنا، بتحصل بينهم خناقة بالكلام، بتخلص بإن "فوزية" بتطلق لفظ "برجوازية" على جارتها "زوجة صاحب محل الحلاقة وصاحب العمارة".
بتبدأ الأزمة لمّا جارتها البسيطة متفهمش "برجوازية"، ومتعرفش تفسرها، ويفضل التساؤل ده في دماغها.. هي معناها أنها حرامية ولا كلمة أبيحة ولا ايه؟ دي أجزاء من فيلم (فوزية البرجوازية)
أصل كلمة "برجوازية"
البرجوازية Bourgeoisie مصطلح فرنسي مُشتق من كلمة Burgeis. .و دي كانت طبقة رسمية في المجتمع الفرنسي، ويُصنّف المنتمون لها وفق مصدر دخلهم.
في الثقافة الفرنسية، البرجوازية معناها أعلى شريحة من شرائح الطبقة المتوسطة، اتطورت الكلمة بعد كدة، وبقى معناها طبقة التجار. وحتى القرن التاسع عشر، كان معناها، بصفة أساسية، الطبقة الوسطى اللي بين الأغنيا والفقرا.
معني البرجوازية
المصطلح ليه استخدامات كتير بتختلف تفاصيله من دولة للتانية ومن ثقافة للتانية، لكن ببساطة شديدة معنى "البرجوازية" بشكل عام هي الطبقة اللي في إيديها وسائل الإنتاج أو رأس المال في المجتمع الرأسمالي، واللي أحيانًا بيستغلوا امتلاكهم لعناصر الإنتاج؛ عشان يكونوا ثروة على حساب العمال البسطاء ويستغلوهم، وده اللي ممكن يعيب البرجوازي.
كلمة "برجوازي" في حد ذاتها مش مقصود بيها شيء سيء، ودة بيختلف من مجتمع للتاني، مثلًا في المجتمعات الشيوعية كلمة "برجوازي" شتيمة، و"كارل ماركس" كان معجب بالمباديء الصناعية للبرجوازيين، بس كان بينتقد الاستغلاليين منهم، وكان بيطلق عليهم "برجوازيين مُتعفنين".
يعني مثلًا صاحب المصنع أو المحل أو المَشغل، دول ناس يطلق عليهم "برجوازيين"، وجوّة طبقة البرجوازيين في "البرجوازيين الصغار"، اللي هم أصحاب الورش أو المشاريع الصغيرة، وفي "البرجوازيين الكبار"، ودول اللي معاهم الأصول الكبيرة لرأس المال.. وهكذا.
كمان البرجوازية مش زي الطبقة الارستقراطية اللي بيمتلكوا الأراضي أو الأصول العقارية؛ لأن دول مش مُنتجين، على عكس البرجوازيين.
