إزاي تستفيد من مكتبة السفارة الأمريكية.. ببلاش

السفارة الأمريكية.. شباب كتير بيحلم أنّه يدخلها عشان يخلص ورقه ويهاجر، بس في الواقع أنت ممكن تستفيد منها بطريقة تانية، كل اللي أنت محتاجه هو صورة البطاقة بس.

اصحى بدري، افطر، واعمل حسابك تكون واقف قدام باب السفارة الغربي في حدود الساعة 9 ونص عشان تحجز مكانفي الصف.

خد بالك

وانت رايح سيب أي حاجة الكترونية أو معدن في البيت، لأنّك في التفتيش بتسلم موبايلك وبطاقتك، لو نسيت وخدت معاك الهاند فري أو الشاحن، هتلاقي راجل واقف على الرصيف المقابل للسفارة سلّمه الممنوعات كلها وابقى استلمها وأنت خارج، عرّفه أنك داخل المكتبة عشان ميغلّيش الفلوس عليك.

في السفارة

كدة دخلنا جوّه السفارة وتخطينا مرحلة التفتيش، هتاخد آي دي علقه بشكل واضح في هدومك عشان المارينز ميرخموش عليك. ادخل المكتبة واملى استمارة "طلب الاشتراك بالمكتبة" وسلمها ومعاها صورة البطاقة. هتقعد تستنى دورك عشان تتصور، وفي خلال ساعة ونص بيكون الكارنيه بتاعك طلع وصورتك منورة فيه، الكارنيه ده شغّال وتقدر تستفيد منه لمدة سنتين كاملين.

بعد الكارنيه

كدة طلعنا الكارنيه، تقدر تستفيد منه إزاي بقى؟ قدامك مليون حاجة تعملها جوّه المكتبة.. لو غاوي قراءة هتلاقي مكتبة طويلة عريضة مليانة كتب من كل التخصصات، معظمها إنجليزي طبعًا بس ممكن تلاقي كام كتاب عربي. ده غير أنك من حقك تستعير أي كتاب لمدة أسبوعين، ولو اتأخرت بتدفع غرامة 5 جنيه عن كل يوم.

كمان لو عايز تاخد الـTOFEL والكتاب غالي عليك، تقدر تستعيره هو والسي دي كمان، وطبعًا ببلاش.

سلطان زمانك

جوّه المكتبة، في كم كبير جدًا من شرايط الأفلام والمسلسلات "إنجليزي طبعًا" ممكن تختار منها أي فيلم وتقعد سلطان زمانك تتفرج عليه لوحدك وسماعاتك في ودانك، طبعًا مش محتاجين نقول أن مفيش ترجمة عربي، لكن هتلاقي الكلام بيتكتب بالإنجليزي، خلّي عينك عليه وأنت بتسمع عشان تحسّن الإنجليزي بتاعك بالمرّة.

الانترنت

لو مش غاوي كتب وأفلام ممكن تستخدم الإنترنت، طبعًا انت مسَلم موبايلك برّه ومش معاك لاب توب عشان ممنوع، هتلاقي كام كمبيوتر هناك "Apple" تقدر تستخدمهم براحتك، بسرعة نت وهميّة بالنسبة لسرعات الإنترنت في مصر.

كل الأجهزة مشغولة؟ بسيطة.. هتلاقي عندك عدد كبير من الألعاب والـ«puzzles» والكلمات المتقاطعة وألعاب ذكاء كتير ممكن تتسلى فيهم.

الإنجليزي

غير ده كله أنت تقدر تتابع الجدول الشَهري للسفارة عشان تعرف الفاعليّات اللي هتنظمها، والكورسات والـ"workshops" المجانيّة وتحجز فيها وتحضرها، ده غير إن كل يوم أربع السفارة بتنظم "conversation club" لمدة ساعة، بتحضره بالحجز المُسبق اللي بيفتح يوم الخميس الصبح، وهناك هتقدر تتكلم مع أمريكين عشان تطور الإنجليزي بتاعك وتدّرب عليه.

كل الكلام ده تقدر تعمله ببلاش، مش هتحتاج غير بس بطاقتك وفلوس مواصلاتك، المكتبة شغّالة من 10 الصبح لـ4 العصر، لو هتقضي يومك كله هناك، لازم تعرف أن جوّه مفيش أكل، حاول تفطر كويس قبل ما تروح عشان تكمّل اليوم كله هناك وتعرف تستمع بكل حاجة.