ويزو وشيماء سيف.. كوميديانات مصر الجُدد
الكوميدينات النساء في مصر على الرغم أنهم يتعدوا على الصوابع.. إلا إن كل واحدة منهم علامة فنية في تاريخنا الفني.. بداية من ماري منيب وزينات صدقي ووداد حمدي.. مرورا بسعاد نصر و إسعاد يونس وهالة فاخر.. حاليا ظهر جيل جديد من الشابات الكوميديانات اللي قدروا بطلتهم المبهجة إنهم يلفتوا نظر الوسط الفني ليهم.. وده خلاهم يظهروا في أعمال سينمائية وتليفزيونية ومسرحية وياخدوا مساحات دور كبيرة بشكل سريع على عكس مساحة الدور الصغيرة اللي كان بياخدها بعض الممثلين في وقت ظهورهم.. وابتدوا يوصلوا من خلال الأعمال ديه لكل الناس ويضحكوهم من قلبهم.. والشابات الكوميدينات دول هما دينا محسن و شيماء سيف.
دينا محسن الشهيرة بـ"ويزو"
مين منا مبيضحكش أول ما بيشوفها في تياترو مصر "مسرح مصرحاليا".. اللي من أول ما ابتدى وهى قدرت إنها تبني ليها شعبية عند الجمهور لأنها بتعرف إزاي تخلق كوميديا من أي موقف.. وسريعة في أنها تقول إيفيهات مناسبة للمواقف بتخلي الجمهور يحفظها عن ظهر قلب ويقولها لأصحابه من كتر ما الإيفيه علم معاه.
ويزو اتخرجت من كلية تربية فنية جامعة عين شمس.. وموهبتها التمثيلية ابتدت من وهى في مسرح الجامعة واشتركت في مهرجان المسرح وهى في سنة تالتة.. وبعد ما خلصت الجامعة دخلت في خطوتين الأولى هى شغلها مع المخرج خالد جلال في مركز الإبداع الفني.. و الخطوة التانية اللي لازالت نجاحتها مستمرة لحد دلوقت هى خطوة شغلها مع أشرف عبد الباقي في مسرح مصر.
وشغلها في مسرح مصر فتح ليها الفرصة أنها تشترك في أعمال سينمائية زي فيلم جيران السعد مع الفنان سامح حسين.. وفيلم جوازة ميري مع الفنانة ياسمين عبد العزيز وحسن الرداد وكريم محمود عبدالعزيز.. ولسة ويزو هنشوفها في أعمال كتير لأنها بتحب تسعد الناس والجمهور بيحب يشوفها وهيحب يستناها في أعمال كتيرة.
شيماء سيف
روح شيماء سيف الحلوة خلت الجماهير تتابعها في كل حاجة بتعملها.. سواء كانت بتعمل دور كوميدي أو اجتماعي أو حتى وهى مذيعة لأننا بنحس إنها واحدة مننا بنت بلد أصيلة فيها عرق الدم الخفيف بتاع الشعب المصري من الأخر كدة بنت نكتة :D
شيماء اتخرجت من كلية تجارة وشاركت في أعمال فنية سينمائية ومسرحية وتليفزيونية كتيرة.. زي أفلام مهمة في فيلم قديم وعيال حريفة ونوارة اللي هيتعرض قريب في السينما.. ومسلسلات سجن النسا وولي العهد ولهفة والكبير أوي و البيوت أسرار ويوميات زوجة مفروسة والسبع وصايا وتفاحة أدم.. في كل عمل من الأعمال ديه كانت شيماء بتطلع بدور مختلف متميز بتسيب بيه أثر عند الجمهور وبتطلع من روحه ضحكة من القلب أو بتخليه يسقف من كتر ما دورها أثر فيه وصدقه.
كمان شيماء شوفناها مؤخرا مذيعة في برنامج نفسنة.. اللي قدرت إنها تجذب ليه نسبة مشاهدة كبيرة وده بسبب أنها منحت شكل المذيعة طابع الكوميديا اللي خلانا نستقبل منها أي حاجة هى بتقولها.. ونحب إننا نتفرج عليها لأنها دمها خفيف على قلبنا على عكس مذيعات كتير بتصطنع الكوميديا.
