بتعرف تغنى؟.. 5 طُرُق للحفاظ على موهبتك
لو حسيت إنك بتعرف تغني، وكل لما حد يسمعك يقول لك "الله" اعرف إن ربنا أهداك موهبة عظيمة، موهبة إنك تعبر عن مشاعر الناس بكل أفراحها وأحزانها، وحاجة زى كده لازم تحافظ عليها بكذا طريقة عشان تقدر تنمى موهبتك.
أول طريقة: حافظ على صحتك وصوتك
حافظ على جسمك إنه مايجيلوش برد، لأنه هيأثر على صوتك وهتلاقيه مشروخ، وكمان حاول تتحكم في أعصابك وماتعليش صوتك إذا قابلك موقف يضايقك، لأن ده هيخلى صوتك يروح، كمان تحافظ على إنك تعمل تمارين نَفَس: تاخد نفس وتكتمه 5 ثوانى أو 10 زى ما أنت عايز، وبعد كده تخرجه بالراحة، وده عشان لو الأغنية فيها موال، تقدر تقوله من غير ما نفسك يروح.
كمان تظبيط مواعيد نومك وإنك تاخد كفايتك من النوم حاجة مهمة، لأنها بتريح أحبالك الصوتية، وبتخليها في حالة كويسة، وشرب المياه الدافئ يساعد على صفاء الصوت، بالإضافة إلى إن المشروبات الساخنة مثل الينسون تساعد على راحة الأحبال الصوتية.
وأنت جاى تغنى في بيتك، حاول إنك ماتعليش صوتك خالص، وحاول تغنى بصوت هادى عشان ماتجرحش صوتك، وطبعًا مهم قوى إن الحاجات دى تخليها تبقى أسلوب حياتك، مش مربوطة بس بكونك عايز تحافظ على موهبتك.
ثانى طريقة: التدريب المستمر والاحترافى
دور على أماكن تتدرب فيها على الغناء بشكل احترافي، عشان تتعرف على أصول الغناء الصح وكل حاجة فيه تقدر توصلك إنك تكون مطرب متميز، وطبعًا إنت عندك أماكن كتيرة، زى مثلاً دار الأوبرا المصرية، أو معهد الموسيقى العربية اللي هيبدأ يعمل دورة جديدة من تعليم الغناء يوم الأحد 3 يناير لمدة 3 شهور، وهيكون سعر الشهر بـ500 جنيه، ويوم الأحد هيكون يوم ثابت والمعهد موجود في 22 شارع رمسيس بجوار صيدلية الإسعاف في وسط البلد، ودى طبعًا فرصة إنك تتدرب وتتعلم في عقر دار المكان اللي بيعلم الغُنا على أصوله.
تالت طريقة: كسر رهبة الوقوف أمام الجمهور
لو فيه أى "إيفينت" شوفته هيكون فيه فرصة إن أي حد يغنى، اشترك فيه على طول، لأنه هيوصل صوتك لجماهير عريضة، وهيكسر عندك رهبة الوقوف قدام الجمهور لو كانت عندك الرهبة دى، وهتلاقى إن كل إيفينت بتروحوا بتبنى ليك قاعدة جماهيرية بتحب صوتك وشايفاك هتوصل وهتكون مطرب مشهور.
رابع طريقة: حاول تكوين فرقة موسيقية
لو في دماغك فكرة أغانى معينة عايز تغنيها، مثلاً راب، أو تراث، وتعرف ناس بيعزفوا آلات مختلفة، ممكن تكونوا مع بعض فرقة، وتبدأوا تندمجوا مع بعض وتتفقوا إنكم تقدموا شيء مختلف ومتميز، وبكده هتلاقي نفسك بتدرب وفي نفس الوقت بتنمّى موهبتك، وكمان بتبنى مشروعك الخاص اللى مع شغلكم فيه هيوصل إنه يكون ناجح، وليه اسمه وسط فِرَق تانية كبيرة.
خامس طريقة: حاول التقديم في برامج المواهب
«The voice» و«Arab idol» و«star Academy» كلها برامج مواهب متشافة من جماهير كتير حول العالم، تقدر إنك تقدم فيها لما يفتحوا الفرصة للتقديم، لأنك بجانب إنك هتاخد خبرة كبيرة من نجوم كبار، هتقدر كمان إنك توصّل صوتك لجماهير كتير من مصر وبرا مصر، ومتضايقش اذا مكسبتش وفزت بالمركز الأول، لأنك بالعكس كسبت خبرة، وبنيت قاعدة جماهيرية من جمهور حبك، وصوتك أسعده، ومادام صوتك أسعد الجمهور، هيفضل واقف وراك ويدعمك في كل حاجة بتعملها، وعمره ما هيخسرك، بس أنت ماتكسلش عن موهبتك وابنيها واحدة واحدة، وخليك متأكد إنك هتوصل في يوم من الأيام للي أنت عايزه :)
