مدير؟.. 4 نصائح تجعلك محبوبا للموظفين

انك تبقى مدير ده شيء مش صعب لأن انت بتكون عارف انك تعبت في شغلك وكافحت وأكيد هتوصل في يوم إنك تترقى وتكون مدير، بس في نفس الوقت هو تحدي صعب، تحدي لأن إنت بقى عليك مسئولية كبيرة  غير مسئولية المهام الوظيفية الكتيرة. ازاي تبقى مدير متميز و كل الموظفين اللي تحت ايدك بيحبوك ،وعشان تعرف اجابة السؤال ده اقرا الموضوع :)

اسمع كل تفصيلة بيقولوها

اقعد مع الموظفين واسمع كل تفصيلة بيقولوها اسمع بتركيز مش تبقى مودي وشك الناحية التانية عنهم وباصص في مكان تاني واللي قدامك بيكلم الهوا أو تبقى بتسمع وانت متلهوج وعايز تخلص بسرعة أو تبقى باصص عينك في عينهم بس انت بتفكر في حاجات تانية وشوف اهتمام كل واحد ايه ونفسه يوصل لإيه في شغله وبيحلم بإيه، وايه اللي مضايقه في الشغل وايه المهارات اللي عندهم وايه إقتراحتهم لتطوير الشغل وخد كل كلامهم اللي بيقولوه على محمل الجد، ومتنفضش لأي كلمة بيقولوها لأنك لو نفضت ده هيضايقهم وهيحسسهم انهم ملهمش لازمة وشغلهم اللي كانوا حابينه هيكرهوه.. لأنك مش بتهتم بأرائهم.

حسسهم بالأمان مش انهم تحت التهديد

بمعنى انك مش كل شوية تقولهم انهم قدامهم فترة و ان احنا هنمشي ناس قريب وهنجيب ناس تانية  لأن ده بيحسسهم انهم قاعدين في المكان مهددين في أي لحظة ممكن يطردوا مع انهم شاطرين وشايفين شغلهم، يمكن انت بيكون غرضك انك تخليهم في ضغط أعصاب عشان يطلعوا شغل كويس أو مديرك عايزك تعمل كدة عشان لما تضغطهم هيبان الناس اللي بتستحمل واللي مش بتستحمل وبكدة هيمشي ناس ويوفر الفلوس اللي بيدفعها.

بس الضغط ده عمره ما هيطلع شغل كويس ده بالعكس الشخص اللي كان جاي الشغل عشان حابب يشتغل وحابب ينتج أول ما يسمع التهديد ده منك هيتقفل من الشغل و هيكون قرفان وهو جاي كل يوم الصبح  وبدل ما بيعمل الشغل عشان حبه هيعمله تحت تهديد كلامك.

فإنت لو من الأول اتبعت سياسة الأمان مع موظفينك ده هيكون دافع ليهم انهم يشتغلوا بحب بالإضافة كمان  للنقطة الأولنية اللي لما تعملها هيكونوا مرتاحين نفسياً وحابين يشتغلوا، وهيكونوا كمان مطمنين إنهم في إيد أمينة عايزة تطلع منهم كل شيء كويس مش مجرد إنسان عابر مر في حياتهم كل لما يفتكروه يشتموا فيه لأنه كان بيهددهم.

مكافأة للفاشل و الناجح

كافأ موظفينك اعتبرهم ولادك اللي عايز تبسطهم الشاطر منه كافأه و اللي مش شاطر برده كافأه لأنك بمكافأتك ديه هتخليه يبقى شاطر لأنك هتقوله أنا كافأتك عشان أحسسك بطعم المكافأة الحلو فعشان تحسها بجد عايز أشوف منك شغل عال العال، عشان تنزلك مكافأة أعلى من المكافأة ديه الشهر الجاي وبكدة انت خليته يحس ان شطارته هتكسبه لكن فشله مش هيجبله حاجة.

صداقة لأخر العمر

رتب إن كل فترة تخرج مع موظفينك في أي مكان جديد وده هيبني بينك وبينهم صداقة وهتبقى العلاقة بينكم مش مجرد مدير وموظفين، لأ ديه هتبقى صداقة هتفتح ليكم مجال انك تتعرف عليهم أكتر وهما كمان يتعرفوا عليك والخروجات ديه هتقوي العلاقة ما بينكوا، وهتخلي الموظفين راجعين الشغل عندهم حماس انهم يطوروه ويبذلوا كل جهد فيه وبكدة هتلاقي ان الأربع حاجات دول هيخلوا موظفينك يحبوك وهتبقى بالنسبة ليهم قدوة يفتكروها ويحكوا عنها لولادهم.