4 أسباب تخلينا نحب السينما الهندية

السينما الهندية قدرت تاخد جزء كبير من اهتمامات كتير من المصريين السينمائية، وبقينا نتابع أخبارها ونستنى الأفلام اللي هتنتجها. طب يا ترى ليه حبينا السينما الهندية؟ وإيه هي الحاجات اللي شدتنا أننا نتفرج عليها؟ ده هتعرفوه معانا من خلال الموضوع ده :)

حبنا للطبيعية

حبنا للمناظر الطبيعية اللي موجودة في الهند، وحلمنا أننا نسافر هناك، سواء فسحة أو دراسة، عشان نروق بالنا ونغير جو ونعيش الطقوس الهندية بكل تفاصيلها، ده سبب من الأسباب اللي خلتنا  نحب نتفرج على أفلامها كتصبيرة لحد ما نزورها ونزور الأماكن اللي شوفناها في الأفلام دي.

الفكرة والتشويق 

على الرغم أن بعض الأفلام الهندية بتكون بتدور في فكرة واحدة، وأساسها الحب اللي بيجمع بين البطلين، إلا أن كل الأفلام دي بتتعمل بشكل مختلف، ولما نيجي نتفرج عليها بنحس بالتشويق، وعمرنا ما حسينا بالملل؛ لأن كُتاب الأفلام دي بيعرفوا إزاي يخلوا الأحداث مشوقة، ويكون فيها عنصر صراع بيخلينا نتابع الفيلم لآخر تفصيلة فيه، مهما كانت مدته طويلة.

وكمان الاهتمام القوي بعنصر المشاعر، كُتاب الأفلام بيهتموا جدًا بتفاصيل شخصيات أبطالهم، وده بيخلينا نصدقهم في فرحهم وحزنهم، وطبعًا كل دي عوامل بتخلينا نحس أن الفيلم الهندي قريب من قلبنا، وأنه مش مجرد فيلم بيعدي علينا وخلاص، لأ ده بيأثر فينا وبنفضل فاكرين أحداثه والمشاعر اللي حسيناها واحنا بنتفرج عليه.

وشوش أبطالهم المميزة

أبطال السينما الهندية، زي شاروخان، أميتاب بتشان، راني موخرجي وغيرهم، دايمًا بيكون فيها عنصر الوسامة، وبالتالي بقينا نحب أبطال الأفلام، وخلانا نحب نتابع السينما الهندية؛ لأننا حابين نشوفهم بعد ما دخلوا قلبنا، وبقوا نجومنا المفضلين وضيفناهم للستة نجومنا المصريين والأجانب.

الاستعرضات والأغاني

 كل الاستعراضات اللي بتتعمل أغاني الأفلام الهندية بتبقى مصدر بهجتنا، وبتخلينا نرقص على ايقاعاتها؛ لأننا بنشوف قدامنا ناس بيتحركوا ببهجة، ومنظمين في حركتهم، وكمان ألوان لبسهم دايمًا مبهجة ومفرحة، وده بيعمل حالة من الفرحة مهما كنا متضايقين.

بكل الأسباب دي.. نقدر نقول أن السينما الهندية مميزة ومختلفة، وتشد أي حد أنه يتفرج عليها.