«محل الدكان».. الجبن بطعم مختلف
اركب/ي «المترو» وانزلمحطة «المسرة»، على ناصية الشارع «كشري هند»، دخلنا الشارع ولقينا « الدكان» محل صغير، صحبتي بتأكد أنه أحلي مطعم ممكن ناكل فيه مكسات الجبنه مع الأكل العادي إللي متعاودين عليه.
الأصناف
« كبدة، سجق، شيش طاووق، لحمة، جمبري، بسطرمة، تركي، بانية، بطاطس، مكس جبن،سكلانس»
المنيو
شكل المنيو لوحده يجذب، هو لوح خشب كبير مكتوب عليه كل الأطباق والطريقة إللي عايزها بها، يعني «جبن،أو اسكندراني، أو سندوتشات»، طبعا أنا مفهمتش المنيو زيكو بالظبط.
الجبن في دكان عبارة عن «طاسة فيها الأكلة إللي عاوزاها وعليها مكس الجبن كله»، و"الاسكندراني" يعني "الأكل المشطتطش الحراق"، وسندوتش معروف، فيه جبنه بس بتكون أقل.
طاسة «بانية وسجق»
الطاستين جاين في الطريق شامين ريحة قوية، أول ما تشوف الطاسة مش هتعرف مين فيهم البانية ومين السجق.. الجبنة مغرقة الطاسة وكمان بتشد.
البانية، متقطع قطع صغيرة، ليه تتبيلة خاصة مختلفة عن سندوتشات البانية إللي ممكن تاكلها في أي حته، عليها مكس جبن "تركي، ومتدزريلا، وجبنة تانية مش هتعرفها من الأول" ومش هتكلم كتير وانت بتاخد قطعة بانية واحدة وبتشد الجبنة معاها... ياميييي
أما السجق، كان متفتفت، ليه طعم ظاهر فيه كل التوابل تقدر تميزها على طول ومتقطع معاه فلف رومي.
أصل الدكان.. سويسرا
أتفتح من 5 شهور، صاحبه ميشيل عشريناتي خريج نظم ومعلومات، فكرة «الدكان» استوحاها من «ألبان سويسرا» إللي موجود في إسكندرية، الفرق إللي بينهم -حسب كلامه- في النكهات المختلفة للجبن،وتتبيلية كل أكلة، و قال ميشيل كمان في كلامه معانا« إنه بيهتم جدا بشراء توابل معينة اسمها الشرق الاقصي بتتباع في مدينة نصر».
حبة حكاوي
مكنش ينفع، ناكل ونمشي من غير ما نتكلم مع ميشيل صاحب الدكان، إللي طبعا سألناه أسئلة كتير وهو رحب جدًا وجاوب عليها.
أكتر الأطباق؟
الكل بيحب يجرب كل أنواع الأطباق إللي عندنا، بس الأغلبية بيطلبوا البسطرمة والسجق
في مشاهير زارت الدكان؟
المشاهير إللي دايما بيزورنا أبطال تياترو مصر «ياسمين وسارة،أس أس، إبرام.. وغيرهم»، وكمان« cbc سفرة» جربت الأكل وهتصور معانا قريب.
جديد الدكان هيكون إيه؟
جديد الدكان، إنه هيفتح فرع جديد فى مصر الجديدة أكبر وأوسع عشان شلل الصحاب واللمة الحلوة.
أكبر مشكلة في الدكان؟
أكبر مشكلة بتواجه الدكان، المكان نفسه، ممكن ميناسبش البنات؛ عشان هو في شارع جانبي وسط البيوت والعماير السكنية في منطقة شعبية يعني لو مجموعة بنات ممكن تتكسف تقعد لوحدها ،ورغم كده في بنات كتير بتيجي وتقعد.. المكان أمان جداا بس «مش كل البنات زي بعضها».
المكان
24 شارع الشهيد محمود سامي متفرع من شارع شبرا
الوصف: أنزل محطة مترو مسرة، بعد محطة الشهداء على طول أول ما تطلع من المترو اتجاه شارع ابن الفرات هتلاقي كشري هند على ايدك اليمن على ناصية شارع جانبي ادخل الشارع ده هتلاقي الدكان على ايديك اليمين برده.
