كيف تختارين «بوكيه ورد» يناسب وزنك وطولك؟
لما تيجي تختاري بوكيه ورد في فرحك لازم تخدي بالك لأن مش أي جيرب ينفع.. في جيربات بتناسب ناس وناس لأ.. عشان كده هنوضح القصة ديه في السطور التالية.
لو طويلة.. عزة علي المتخصصة في الزهور.. بتنصحك إنك تجيبي جيرب طويل نازل منه فروع شجر بيسموه جيرب بدلاية.. ولو جسمك رفيع فبتنصحك إنك تاخدي جيرب طويل صغير مش كبير وده عشان يكون جيربك شكله متناسق مع طولك ووزنك.
ولوقصيرة.. أحمد الجندي المتخصص في الزهور.. بينصحك تجيبي جيرب مدور.. ولو بجانب قصرك وزنك زيادة لازم تاخدي جيرب مدور كبير وده عشان يكون جيربك متناسق مع طولك ووزنك
التناسق مش بس في الجيرب.. لأ.. ده كمان في اختيارك لورد قاعة فرحك أو خطوبتك.. المتخصصين في الزهور اتفقوا إن أي واحدة هتعمل فرحها أو خطوبتها في قاعة لازم تختار ورد يناسب ديكور ومكان القاعة.. يعني الورد يكون متناسق مع كل تفاصيل القاعة.. مثلا لو كانت الترابيزة في القاعة كبيرة مينفعش نحط عليها ورد صغير.. لازم يتحط عليها ورد في كاسة كبيرة.. ونفس الحال لو الترابيزة صغيرة مينفعش يتحط عليها ورد كبير.. وده كله عشان يكون في تناسق.
