5 نصائح.. عشان تنسي تجربة حبك
كتير من البنات بعد ما تمر بقصة حب طويلة، وتتعرض لموقف إن حبيبها فجأة يسيبها بدون أي سبب مقنع، وده بعد لما تكون بنت كل حياتها عليه واللحظة ديه بتكون صعبة جداً على البنت، لأنها بتحس وقتها ان روحها بتتسحب منها.. «شبابيك» بتقدم لك صائح تخليكي تخرجي من التجربة قوية.
دلوقتي أحسن من بعدين
فكري كويس جداً ان ده حصل دلوقتي مش بعد لما تكونوا اتجوزتوا فجأة يسيبك ويطلقك من غير سبب وتبقي حالة من حالات طلاق كتيرة رصدها مركز معلومات دعم اتخاذ القرار الي وصلت لنسبة 40% في الخمسين سنة الأخيرة، فكري بمنطق قضى أخف من قضى وكويس جدأً انه بان على حقيقته دلوقت أحسن ما كنتي تجيبي أطفال يتوهوا نفسيًا بينك وبينوا.
افتكري الحاجات اللي نستيها عشانه
افتكري مواهبك شغلك أهلك حياتك اللي أهملتيها عشان هو كان باعدك عنها تحت شعار الحب وانه هو الشيء الوحيد الأهم في حياتك شوفي كنتي موهوبة في ايه ونمي موهبتك ارجعي دوري على شغل تبني فيه نفسك اقعدي مع أهلك واشبعي منهم، دبي في حياتك الروح من تاني فلو كانت هوايتك مثلًا عمل لبس بالتريكو ارجعي اعملي ملابس كتير واعملي ليكي صفحة على الفيس وسوقي لنفسك واشتغلي وهتلاقي واحدة واحدة ان طعم نجاح موهبتك بينسيكي كل حاجة مضايقاكي.
خدي من ذكرياته دروس وارميها
أول ما تفتكري ذكرياته الحلوة معاكي وتصحي على انه خلاص سابك في الوقت ده تخيلي انك بترمي حلاوة ذكرياته ورا ضهرك، و خدي من الذكريات ديه دروس اتعلمتيها من تجربتك معاه زي مثلاً انك تعرفي الفرق بين الحب الفاشل والحب الحقيقي، عشان يوم ما تقابلي حب في حياتك تعرفي تفرقي صح وتحسي بطعمه لو كان حب حقيقي وكمان انك تعرفي تختاري صح وتوازني في اختيارك بين قلبك وعقلك مش بقلبك بس.
القلب يحب مرة واتنين وتلاتة
فكري ان لو حبك راح ربنا هيعوضك بأحسن منه، ولو اللي أحسن منه راح اللي أحسن و أحسن منه هيجي وان مادام قلبك فيه نبض يبقى قادر انه يحب و يتحب وحطي الأية الكريمة ديه حلقة في ودانك "الطيبون للطيبات والخبيثون للخبيثات".
متسمعيش لحد، ابعدي، ردي بحكمة
لو حد قالك قولنالك بلاش تدخلي في التجربة ديه ضيعتي مستقبلك على الفاضي، وأي جمل شبيهة للجمل ديه ردي عليهم بردود تقفلهم ومتخلهمش يسألوا مرة تانية، ولو فرضاً سألوا ردي عليهم بنفس الرد اللي ردتيه وهكذا لحد ما يزهقوا وميرودوش تاني، يعني ممكن تقولي كل شيء قسمة ونصيب وعيديها في كل مرة يسألوكي فيها ولو مش عايزة تردي وشايفة ان ردك عليهم بيتعبك نفسياً يبقى ارفضي أي حد يتكلم معاكي في الموضوع وابعدي وخدي وقتك في الرجوع لحياتك من تاني وكأن شيئاً لم يكن.
