للطلاب.. إزاي تحل«Bubble sheet»؟
كتب- هبة أبو شادي
الـ«Bubble sheet» هو نموذج امتحان إليكتروني جديد يشبه النظام الأمريكي، يسمح للطالب اختيار الإجابة الصحيحة عن طريق تلوين الدوائر الموجودة بورقة الإجابة، حيث يتم تصحيح أوراق الإجابات عن باستخدام الكمبيوتر ما يوفر الوقت والجهد على الطلاب وأعضاء هيئة التدريس.
عدد من أعضاء هيئة التدريس في بعض الجامعات تستخدم هذا النموذج في الامتحانات، ويقدم «شبابيك» نصائح للطلاب الذين يطبق عليهم هذا النموذج من الامتحانات:
• لازم تكون عارف أن النوعية دي من الامتحانات بتختبر فهمك وحضورك للمحاضرات فماعليك إلا القراءة وفهم الموضوعات وترتيبها وحفظ العناوين وتعريفاتها فقط يعني «الزتونة مش هتنفعك».
• الامتحان النهائي بيكون فيه من 80 لـ 100 سؤال بالنسبة للمواد النظري، وأقل في المواد العملية ومدة حل الامتحان ساعتين، بمعنى أن مدة حل كل سؤال أقل من دقيقتين.. وبالتالى اقرأ السؤال مرة واحدة أو مرتين مش أكتر عشان متضيعش وقت سؤال تانى أنت عارفه.
• لو فى سؤال مفتكرتش إجابته سيبه وشوف اللى بعده بس اتأكد أن مكان إجابة السؤال اللى أنت مش عارفه فاضي عشان الغلط فى الترتيب هيضيع منك نص الامتحان.
• إجابتك تكون بالرصاص عشان تقدر تمسحها لو عرفت إنها غلط لأن الـ«الكوريكتور» بيظهر على الكمبيوتر وبيقرأه، فبالتالى أنت هتكون مجاوب إجابتين مش إجابة واحدة والسؤال كله هيتشطب.
• إذا حليت بالرصاص ومسحت حاول تمسح أثر الإجابة الأولى كويس، ويستحسن تتأكد من إجابتك قبل الحل وتلون الدايرة كاملة من غير ماتسيب فيها أي فراغات عشان الكمبيوتر يتعرف على إجابتك ويقرأها بشكل واضح.
