4 أفكار مجنونة للاحتفال مع حبيبتك برأس السنة
بما أنك خلاص قربت تدخل في سنة جديدة، لازم تنهي 2015 بلحظة حلوة مع حبيبتك فيها فكرة مجنونة، عشان تبدأ 2016 وهي «مبهججة» وحباك أكتر من الأول..
«شبابيك» جايبالك شوية أفكار مجنونة تقدر بيها تخلي حبيبتك تتنطط من الفرحة ♥
بابا نويل
خدها واقعدوا مع بعض في أي كافيه وخلي حد من أصحابك يكون مستنيك هناك ومعاه لبس «بابا نويل»، وهدية أنت حابب تهاديها بيها، وقوم جهز نفسك واتحجج بأي حجة مثلا رايح اجيب حاجة من العربية، أو إنك نسيت المحفظة أو الموبابل، وممكن فعلًا تنسى الموبايل بالقصد في العربية، عشان لما تقوم هي متحسش بحاجة.
ولما تقوم روح لصاحبك اللي معاه اللبس خده منه والبسه، واعمل نفسك عجوز وأخرج ليها قبل ما تدق الساعة 12 بحاجة بسيطة، وروح ليها بماشية عجوز واديها الهدية، وقولها «هابي كريسماس» بصوت راجل عجوز، وفجأة غير صوتك لصوتك الحقيقي، وكمل الجملة وقولها «يا حبيبتي»، وشيل وش بابا نويل ☺
Marry me
لو أنت خلاص استقريت بينك وبين نفسك على أنها تكون شريكة حياتك، وناوي أنك في السنة الجديدة تطلب إيديها من والدها، يبقى مفيش أحلى من يوم رأس السنة. اخرج معاها ومعاكوا أصحابكوا، واتفق معاهم أن كل واحد منهم يكون مخبي حرف من حروف «Marry me» معاه، وأول ما تيجي الساعة 12 بالظبط يرفعوا الحروف دي في وقت واحد وتبصلها وتقولها «موافقة؟».
بارشوت
روح لمكان تأجير البارشوت لوحدك قبل يوم رأس السنة، وخد معاك ورد وبلالين هيليوم عليها كلمات بتعبر عن حبيبتك، وقولهم أنك عايزهم لما تيجي تنط من الطيارة مع حبيبتك يوم رأس السنة أنهم ينطوا معاكوا في نفس الوقت كأنهم بيدربوا، وفجأة يعملوا حواليكوا دايرة ويمسكوا البلالين، ويرموا الورد عليكوا.
علي صوتك بحُبها
خدها واخرجوا في أي مكان بس يكون فيه ناس، وأول ماتدق الساعة 12، عالي صوتك وقول للناس أنك عايز تقول حاجة لحبيبتك، وعايزهم يبقوا شاهدين عليك، وقول كل اللي في قلبك ليها، وعلي صوتك بحبها، وممكن كمان تتفق مع ناس بيغنوا أنهم يكونوا موجودين في نفس المكان في اليوم ده، وأول ما ترنلهم على الموبايل قبل الساعة 12 بشوية صغيرة يستعدوا أنهم يغنوا ليكوا بس غناهم هيكون بصوت هادي، عشان ميغطيش على صوتك وأنت بتتكلم يعني غناهم كأنه خلفية لقصة أنت بتحكيها.
