أفكار مختلفة تبسط حبايبك ليلة رأس السنة
يوم رأس السنة نقدر نقول عليه انه اليوم اللي بنفتكر فيه كل حاجة حصلت لينا طول السنة سواء حاجات حلوة فرحتنا أو حاجات وحشة ضايقتنا، وعشان اليوم ده يبقى مختلف بالنسبة لينا ويبقى نقلة جديدة في حياتنا لسنة جديدة، «شبابيك» هتقولكوا على حاجات تعملوها، تقدروا تدخلوا بيها الفرحة والسرور على حبايبكو :)
اشتري بلالين
اشتري بلالين كتيرة وانفخها وانزل وزعها على كل الأطفال في الشارع خليهم يفرحوا بالسنة الجديدة ويحسوا ان في حد مهتم بيهم وبيحبهم وابتسامة الأطفال ديه هتخليك تستقبل السنة الجديدة ببهجة.
ارسم بورتريه
لو بتعرف ترسم وشوش أشخاص انزل الشارع وارسم كل الناس ببلاش خليهم يشوفوا حلاوتهم في الصور وياخدوها ذكرى يعلقوها في بيتهم وكل لما يفتكروها يبتسموا :)
اعملي حلويات
اعملي حلويات عليها شكل بابا نويل وحطيها في علب صغيرة وانزلي وزعيها على الناس في الشارع وكل لما تدي لحد علبة قوليله جملة فيها تفاؤل زي مثلًا ربنا يجعلها سنة سعيدة عليك وممكن تدخلي على الموضوع ده " طريقة سهلة لصناعة هدايا الكريسماس من الصلصال "وتعرفي ازاي تعملي عجاين الإحتفال بالكريسماس.
حاجة مختلفة
خلي اليوم ميعديش الا وانتي عاملة فيه حاجة مختلفة كان نفسك تعمليها زي مثلًا انك تلبسي بارشوت وتنطي من الطيارة أو أي حاجة تانية نفسك فيها.
فيلم حلو مع لمة العيلة
جمعي أهلك في اليوم ده واقفلوا كلكوا الموبايلات واتفرجوا على أي فيلم أو مسرحية أو مسلسل معروض في التليفزيون رجعوا حلاوة قعدتكوا مع بعض زي زمان.
أكلة جديدة
دوري في اليوم ده على وصفة أكل مختلف سواء من مواقع على الإنترنت أو انك تسألي أصحابك و جربي تعملي أكلة حادقة وحلوة وخلي أهلك ياكلوا من عمايل ايدك.
