خروف العيد.. أجدد هدايا العشاق والمخطوبين
بيطلع في كل عيد موضة جديدة أو "تقليعة" جديدة بمعنى أصح، وتلاقي البنت في كل عيد بتطلب من حبيبها أو خطيبها يجيبلها الهدية بقى، وهو لازم يلعب دور "الجني" أو "العفريت" محقق الأمنيات ويلبي كل طلباتها، حتى من غير ما تطلب.
زمان كانت هدية الحبيب لحبيبته في الغالب توقيتها الرسمي هو عيد ميلادها، بعدين المناسبات اللي بقت الهدية في شئ إجباري كترت أوي.. تعالو نشوفها سوا:
القلب والدبدوب
تلاقي هدية عيد الحب هي الدبدوب الأحمر اللي مغرق الشوارع، والقلب اللي مكتوب عليه بالأبيض، والورد طبعا أساسي، والولد عليه يختار يجيب السنة دي قلب ولا دبدوب ولا ورد ولا ايه.
لو الشاب نسي وماشافش كل المهرجانات اللي بتتعمل في المحلات وعلى الأرصفة في الشارع، يبقى كده مش بيحبها ولا فاكرها، عيد حب يعني هدية، معروفة دي!
الفانوس
جه شهر رمضان، كل سنة وانت طيب، بس قبل ما تفكر هتتسحر ايه، فكر هتجيب لحبيبتك ايه، يعني فانوس خشب ولا بلاستيك ولا صاج، ولو ماجبش وعملت نفسك من بنها تبقى بخيل وهتبهدلها بعد كده، ده انت الفانوس حتى ما جبتوش ياراجل!
شجرة الكريسماس
مع نهاية كل سنة ميلادية وبداية سنة جديدة بقى إجباري الشاب يجيب لخطيبته شجرة كريسماس هدية أو بابا نويل.. وطبعا البنت بتبقى بتتمنى وتقول لنفسها "يا سلام لو جاب الاتنين" فلو خطيبها نسي ده ليلته بتبقى سودة.
خروف العيد
أما أجدد موضة واللي انتشرت السنادي بشكل أكبر من الكام سنة اللي فاتو هو "خروف العيد".. عندك خروف فرو كبير كده شبه دبدوب عيد الحب اللي قولنا عليه بس ده أبيض مش أحمر أكيد، واللي وصل سعره لـ 100جنيه و 150 جنيه كمان، ما هو احجام بقى.
وعندك كمان خروف بلاستيك اللي هو بتاع "شون ذا شيب" وده بقى اختراع، بيتحرك ويهز ديله وحاجة كيوت خالص وسعره وصل 40 جنيه، مش معاك الفلوس، فيه كمان خروف صغير من اللي بيتلزق على المرايات والأزاز، واللي وصل سعره 15 جنيه، ملكش حجة بقى!
كده عرفت هتجيب ايه في عيد الأضحى السنة دي، كل سنة وانت طيب وعقبال ما نشوف الجديد في العيد الجاي!
