«اسمع واسأل».. دليلك لتقوية علاقتك بالأخ الأصغر
في بعض الأوقات بنهمل تعاملنا مع أخونا أو أختنا الصغيرة وده لأننا باصين ليها بصتين، بصة على اعتبار إنه شخص جه يشاركنا في حب أبونا وأمنا لينا، والبصة التانية على إنها شخصية رخمة مش نازلة لينا من زور، وعشان البصة ديه تتغير للأحسن تعالوا شوفوا مع "شبابيك" ازاي.
اسمعيها
لما تيجي اختك الصغيرة سواء كانت في ابتدائي أو اعدادي أو ثانوي تكلمك اسمعيها بإهتمام زي ما بتسمعي أصحابك في الشغل أو الكلية، حتى لو الكلام اللي بتقوله بالنسبالك أهبل ملوش قيمة، لأنك لما تسمعيها هتبني بينك وبينها صداقة حبة حبة وهتخليها تحكيلك على كل حاجة بتحصل في حياتها هتخاف انها تحكيها لأهلكوا، فإنتي بالنسبة ليها هتبقي سرها اللي بتحكلها وهى مطمنة واللي لو وقعت في مشكلة عارفة انك هتحليها ليها ومتخليش السمع ده يكون لفترة قصيرةن لأن هى هتحتاجك تسمعيها لحد آخر يوم في عمرها فمتخذلهاش وافضلي الودن اللي بتسمع والقلب اللي بيحب والعقل اللي بيحل.
السؤال عنها لو أخوك أو أختك خارجة كلميها اطمني وصلت ولا لأ، ولو عندها امتحان كلميها برده اعرفي عملت ايه، أما لو كانت قاعدة في البيت وزعلانة فإسأليها ايه اللي مضايقك وخلي السؤال ده ميكونش متوقف على قعدتكوا في بيت واحد ولما تتجوزي متسأليش، لأ خلي سؤالك عنها يبقى طول العمر لأن لو لا قدر الله حاجة حصلت لأهلكوا انتي هتكوني بالنسبة ليها سند مكان السند اللي راح ومن غير سؤالك هتحس انها وحيدة و ممكن تدور على سند غيرك يدمرها، وخطوة السؤال بعد خطوة السمع اللي اتكلمنا عنها فوق هتخلي أي حاجة مضايقها أول لما تسأليها مالك تروح قايلة ليكي على طول من غير ما تفكر اذا كنتي هتقولي لبابا وماما.
بعد لما بنينا خطوة السمع والسؤال اللي هما يعتبروا الأرضية الأساسية في تقوية العلاقة مع أختك أو أخوك تعالوا ندخل بقى على بقية الخطوات
اتكلمي عنها حلو
لما تكونوا قاعدين وسط عيلتكوا وهى تكون قاعدة معاكي وحد يقول عليها حاجة وحشة متقعديش تضحكي أو توافقوا على اللي بيقولوا وردي عليهم بطريقة حكيمة تخليهم يعرفوا ان اللي قالوه ده ميصحش يتقال، لأن ردك ده هيخليها تعرف ان وراها اخت بميت راجل لو حصل أي حاجة معاكي هتبقي أسد مفترس في وشه، وكمان هتخليها متخفش من أي حاجة في حياتها ومن أي حد يقول عليها أي حاجة وهتقوي جواها احساس الأمان اللي هيفضل معاها طول العمر، وطبعًا ده مش هيكون مع العيلة بس ده هيكون مع أي حد يقول عليها حاجة، وخليكي واثقة ان اللي بتعمليه مع أختك، بكرة هى هتعملوا معاكي.
خليكي مصدر معلومتها
ساعات كتير بيدور في ذهن أختك أسئلة كتيرة بتكون عايزة اجابتها خليكي في الوقت ده مصدر اجابتها، ولو مش عارفة الإجابة دوري عليها عشان تقوليلها الإجابة اللي متحتجش بعدها انها تسأل حد وخلي التعامل ده يبقى لغاية أخر العمر بينكوا، لأنها هتحتاج كتير تسأل ولما تكوني انتي اجابتها هيبقى أحسن بكتير جدًا لما تاخد اجابة من ناس تانية يوقعوها في مشاكل او يدمروا حياتها.
