لماذا يكره البعض التصوير؟
لو فتحت موبايل أي بنت هتلاقي صور سيلفي ليها كتير، غالبا نصها مش عاجبينها، كتير مننا مش بيعجبهم شكلهم في الصور اللي بيتصوروها، لأ ده كمان في بنات بتتصدم لما تشوف شكلها في الكاميرا الأمامية، طبعا أزمة التصوير مش عند البنات بس لأ ده في شباب مش بيحبوا صورهم أبدا.. تعالوا نعرف السبب..
لما نبص على شكلنا في المرايات بنبقى فاكرين أننا شايفين نفسنا، لكن الحقيقة إننا بنشوف صورة المرايا لينا، اللي هي في الحقيقة صورة معكوسة.
وفقا لعالم اسمه (ستوكتون) السبب الحقيقي لده راجع لظاهرة اسمها "mere exposure " أو "مجرد التعرض"، ظاهرة مكتشفها اسمه (زاجونك)، ومعناها أننا بنفضل الحاجات اللي بنتعرض لها بشكل متكرر أكتر من غيرها، يعني مثلا لو متعود تشوف إعلان محل معين في التلفزيون، على الأغلب لما تفكر تشتري حاجة هيبقى المحل دا ليه الأفضلية عن غيره، عشان أنت شوفت إعلانه بشكل متكرر.
وبالتالي بعد سنوات من مشاهدة صورتك في المرايات طول حياتك، فالصورة المفضلة ليك هي صورتك في المراية، والمشكلة هنا إن الصور التانية في الموبايل أو الكاميرا (مش صور المرايات) بتظهرلك أنت شكلك إزاي فعلا.
مثلا أنت متعود دايما تشوف حاجبك اليمين مختلف عن الشمال في المرايات، أو ابتسامتك أوسع شوية، وبعدين تيجي تلاقي في الصور الوضع مختلف فتبقى حاجة غريبة بالنسبالك، والظاهرة اللي اتكلمنا عنها بتقول إن الحاجات اللي بنتعرضلها أكتر هي اللي بنفضلها أكتر.
عشان كدا بقينا نلاقى دلوقتي ناس بتصور انعكاسها في المرايا، الصورة دي بالذات بتكون مفضلة ومريحة أكتر لعين الشخص اللي بيتصور، لأنه لا إراديا عقله بيقارن بين الصورة اللي في الموبايل أو الكاميرا، وصورته اللي متعود يشوفها في المرايا، فالأحسن بالنسباله هو الصورة المتعود عليها. المصادر : أضغط هنا أضغط هنا أضغط هنا
