ماذا لو مواقع التواصل الاجتماعي راحت «في خبر كان»؟

موقع "فيس بوك" ليه كام يوم بيقع والناس بتتجن.. طيب ماذا لو صحينا الصبح لقينا (فيسبوك، تويتر، واتس آب، إنستجرام ، ساوند كلاود وتمبلر) وغيرهم من وسائل التواصل الإجتماعي إختفوا، إيه اللي هيحصل ؟..

طب و الـ morning text هيجي إزاي بس؟ وهنطمن على الناس إنها صحيت من غير ما تكتب "صباح الخير" لأ طبعاً مش ممكن!.. طب ما تيجو نشوف سوا إيه ممكن يحصل:

مكالمات ياما

لو تخيلنا إن يوم طبيعي بيبدأ من الساعة 7 الصبح، وإنت نازل من بيتك في طريقك للشغل مفيش طريقة تسمع مزيكا بيها غير "الراديو" أو أغاني موبايلك، هتضطر تتصل بكل اللي عايز تكلمهم في شغل أو تقولهم "صباح الخير" وهتكلم كل حد تأكد عليه المعاد اللي ما بينكوا.. ما خلاص مفيش hey where are you على الواتساب وكده.

ليه سيلفي؟

بتلاقي إن الطريق طول فبتاخد سيلفي و تفتح موبايلك عشان تكتب "on my way to work ufff" أو تصور شكل الطريق بالعربيات عشان تكتب "هذا الطريق أخرته لحن حزين" وتفتكر إن مفيش إنستجرام ولا فيسبوك، يا ترى هتبعتها في "رسالة وسائط متعددة" لكل اللي عندك ولا هتطنش؟

أول ما تدخل شغلك بقى هتفضل تكتب اللي عايز تكتبه على فايل word تستناه يتطبع وتبعته بالفاكس وتستنى الرد بعد وقت.. موال بقى ما خلاص الـ gmail الله يرحمه، كان ممشيلنا الدنيا "زي السكينة في الحلاوة".

مفيش كاندي كراش تاني

هتشتري جرايدك وتقرأ أهم الأخبار و تفتح التليفزيون تسمع النشرة أو تشوف البرامج بتقول إيه، مفيش الأخبار اللي كانت بتجيلك وإنت بتلعب "كاندي كراش" على الجاهز كده.. آه صحيح كمان هتخسر في كاندي كراش عشان مفيش lifes هتجيلك من حد "راح فين زمن الشقاوة؟".

فيه فراغ

يمكن شغلك ما يخلصش بسرعة بس هتلاقي في وقت فجاة فضي، الوقت ده إنت كنت بتستهلكه وإنت بتـ tweet عن شكلك في الشغل وشكل المدير وبتـ favorite أي تويتة بتلاقيها لـ "your ex" صاحبك\صاحبتك القديمة" عشان إنت لسا بتفتح وتدور وراه وعشان إنت بقيت stalker بطبعك، الوقت ده كان زمانك بتتصور فيه مليون صورة وتنزلها تحت هاشتاج #انستا_جنان #انستا_زهق #انستا_شغل_ممل، أو بتكتب كلام عميق على تمبلر وتتفرج على صور العوالم الموازية أو وإنت بتـ repost كل الأغاني اللي سمعتها إنهاردة، وقتك الفاضي من غير السوشيال ميديا هتقعد تشرب فيه قهوتك ومش لازم تسمع فيروز لأن محدش هيشوفك عمقك خلاص، ممكن تقرأ فيه جزء من كتاب من غير ماتكتب reading now أو ع الأقل تشتغل أكتر وتركيزك يكون أحسن.

بعد شغلك هتنزل تقابل أصحابك وتتفقوا بالتليفونات مش على جروب "friends" أو "الشلة"، هتسمع صوتهم بره الـ voice notes وتشوفهم ولما تتجمعوا مفيش موبايلات هتبصوا فيها إلا بقى لو هتبعتوا لبعض "مقاطع فيديو وصور" بالبلوتوث!

لو مرتبط هتتظبط

أما بقى لو مرتبط و على طول بتتكلموا سوا على السوشيال ميديا فهتبقى "بلوة سودة" لأنكوا مش هتعرفوا أخبار بعض أول بأول وكده في حد فيكم هينتحر من تليفونات التاني أو هتسيبوا بعض.. أو ممكن نشوف الموضوع بوجهة نظر رومانسية أكتر ونقول إنكم هتحبوا بعض أكتر و هتبقى علاقتكم متزنة لأنكم هتعرفوا إن "الزن وحش" وتبطلوه.

أهلك هيبطلوا تعليقاتهم على صورك اللي زي "حمادة حبيب عمتو كبر فين أيام ما كنت بشيلك وتعملها ههههههه"، أو "سوسو قمر ربنا يخليكي لماما أنا عمو أحمد سلمي على بابا وماما" وهيبطل الفرع التاني من العيلة اللي بيسيب حياته ويشتغل عندك "كاميرا للمراقبة" ومرتبه بياخده لما بينم عليك مع كل العيلة ويكسب القعدة لصفه.. واحتمال تخلص من الـ54090390 ماسيدج اللي بتجيلك على واتسابك لما ما بتفتحهوش شوية بسبب جروب العيلة!

إلا بوز البطة!

الشئ اللي هيزعل أغلب البنات هو فرصهم اللي هتضيع في تحسين مستوى "بوز البطة" أو الـ duck face اللي بيعملوه في الصور كل 3 ثواني، وكمان مش هتعرف تختار لون صبغة الشعر الجاية لـ soso elsh2ya لما تكتب ستاتيس" blonde or red or black pllzz answer".

السوشيال ميديا بتفرق في حياتنا، بتدخلنا دوامات وتخرجنا من دوامات تانية..الحياة من غيرها صعبة بس مش مستحيلة، ليها عيوبها ومميزاتها زي أي حاجة في الدنيا.. و في النهاية "كل شئ بيزيد عن حده بيتقلب لضده".. و"العقل زينة" ولا إيه؟