أميرة خالد تكتب: بطلوا أفورة.. الشتا مش حضن
في كل بلاد العالم الشتا يعني مطر أو تلج وإن الدنيا سقعة ولازم نلبس تقيل، ده اللي اتربينا عليه من واحنا صغيريين والدنيا كلها عارفاه، بس لما كبرنا واتعاملنامع الكائنات «المأفورة» بدأوا يفهمونا إن الشتا ده فصل المحن..
أيون زي ما بقولك كده «المحن بكل ما يعينه الكلمة يا سيدي»، رافعين شعار «#الشتا_يعني_حضن».. حضن إيه بس ده احنا بنتشعبط في رضا ربنا بصوت الفنانة كريمة مختار.
عموما احنا كسناجل لازم يبقي لينا وقفة عشان نقدر نوصل صوتنا ونعرفهم إن الشتا ده ليه معاني جميلة.
أولا.. الشتا يعني الانتخة ودفا البطانية اللي ملوش حل ويا سلام لو بتتفرج على فيلم أجنبي كمان.. أصلا مفيش أحلى من الانتخة اسمع مني.
ثانيا.. مقولكش على شرب السحلب حمص الشام في الجو ده ياااااه. بتحس إنك دايب في جمالهم، ولا شربة العدس وجنبيها البصل على رأي الشيف حسن «يا جمالو يا جمالو» هو ده معني الدفا الحقيقي
كمان كوباية الـ«Hot chocolate» في البلكونة لما القمر يبقي كامل هي دي الرومانسية مش تقوليلي ده قلع الجاكيت وادهولها.
ولو انت بتحب تتمشي في الشتا يبقي سماعتك في ودانك مشغل اللي بتحبه وانزل اتمشي بليل وخلي «الهواء يداعب وجهك» زي ما بيقولوا واعزم نفسك على أحلى «ىيس كريم».. أيوه صدقني أحلي وقت تاكله فيه.. يا عم اتجنن وعيش الحياة محدش واخد منها حاجة.
واوقولك على حاجة تاني.. لما الدنيا تمطر جرب تنزل تروح مسجد الحاكم بأمر الله أو الازهر وشوف جمال الصحن لما تملاه المية.. عالم تاني.. ومتنساش تتصور هناك كتير.
شغل أغاني زي ما تحب أهو على الأقل لما تشغل أغنية حب هتحس إنك بتحب ولو شغلت أغنية حزينة هتحس إنك لسة مفركش من 3 دقايق ميزة لن يشعر بها إلا السناجل.
لو ربنا كرمك بشوية فلوس اتصل على صحابك وسافروا شرم الشيخ ، أهو منها فسحة وتنشط سياحة بلدك خليك وطني.
ولا اقولك قوم ذاكر الامتحانات علي الأبواب الكتاب اللي انت مفتحتوش وفــي جدا مستنيك تفتحه بقاله كتير وانت سايبه لوحدوا.
في الآخر بقي استمتع بكونك سينجل وافتخر بده.. الشتا في حاجات حلوة كتير استمتع بيها، وارفع شعار الشتا أحلى مع السناجل.
