إزاي توفر وقتك عند شراء الملابس
أغلب الناس دلوقتي بتحب تنزل تتسوق وتعمل شوبنج، التسوق يعتبر نشاط بيخرج الطاقة السلبية ويضيع الاكتئاب، لكن اللي بيخلى الواحد يلغي الفكرة هي الزحمة، خاصة لو فترة خصومات أو أعياد زي دلوقتي، الزحمة بتخلي الواحد يهرب أو بتخلي الشوبنج مهمة انتحارية.
عشان تهربوا من الزحمة وتجيبوا اللي عاجبكوا قدامكوا طريقتين..
لو أنت من الناس إللى بتحب الـBrands:
في الحالة دي الموضوع بيبقى أسهل، أغلب الـBrands زي H&M وZara، عاملين تطبيقات بتحملها من على Google play ببلاش، الموضوع مش محتاج حساب للدخول، كل اللي بيتعمل اختيار البلد واللغة، وبعدين بتظهر قوائم اللبس اللي موجودة فى القسم البناتي أو الولادي، بعد كده بتتصفح البرنامج كأنك ماشي في المحل بالظبط.
بس كل تطبيق بيبقى فيه ميزة أو عيب، مثلًا تطبيقات Zara وBersheka وPULL&BEAR ممكن يخليك تعمل Scan لقطعة عجباك في المحل، ومش عارف تمنها كام، كل اللي هتعمله إنك تفتح التطبيق، وتضغط على Scan هيفتح الكاميرا ويقرا الباركود وهيطلعلك السعر.
أما تطبيق Stradivarius فعيبه إن عشان تتصفح المجموعة الجديدة هتدفع فلوس على المشاهدة، أما تطبيق H&M فهو سهل جدًا وبسيط، بس عيبه إنه بيحمل الصور ببطئ شوية.
التطبيقات دي بيتعملها تحديث إسبوعي وبتعرفك لو فيه خصومات أو المفاجأت اللي بتعملها البراند في وسط الموسم الشتوي أو الصيفي.
كل التطبيقات بتوضح الألوان المتاحة للموديل وسعره ومقاساته الموجود، بعد تصفح كل التطبيقات وتحديد كل الموديلات اللي عجباك، بتحفظها في الـwishlist، ولما تنزل اختار اللون والمقاس بالمظبوط.
انزل فجأة
المحلات المعروفة بس ملهاش لا مواقع ولا تطبيقات نعمل فيها إيه؟، أغلب المحلات دي بتفتح على الساعة 12 ظهرا، لو إجازتك في نص الأسبوع يبقى حلو، أصحى بدري، وانزل افطر ولف على المحلات في الروقان قبل الغزو الليلي، أو لو كنتوا من الناس اللي بتشتغل طول اليوم يبقى تاخد نص يوم وانزل بدري خد جولتك.
