5 سلوكيات حاول تغيّرها قبل بداية السنة الجديدة

كلنا عندنا قائمة لحاجات نفسنا نعملها في السنة الجديدة، أو كان المفروض نعملها قبل ما ندخل في السنة الجديدة.. لكن في مجموعة سلوكيات بنقترح عليك تودعها دلوقتي حالا.

1– القوقعة.. «الـcomfort zone»

الـcomfort zone هى المساحة والقوقعة المريحة اللي بنهرب لها، بس للأسف عمرها ما هتخليكوا تتقدموا في حياتكم، لأن خارجها الواحد بيحس إن العالم مخيف ومالوش معنى.. افتكروا كام مرة كان عندكم حلم ومخرجش للحقيقة عشان مستريح فى الكمفورت زون؟.

2– رأيك فى حياة الناس

فاكرين كام مرة ضايقكوا إحساس إن الناس كلها بتعلق وبتشرف على حياتكوا؟ كام مرة زعلتوا من كلام حد بيحب يعدل على اهتمامتكوا وتحسوا إنه ناقد حياتكم الشخصية؟ خلاص يبقى كل واحد يحتفظ برأيه لنفسه، متقولش رأى غير لما يتطلب، سيبوا اللى عايش ينبسط حتى لو كان اللى بيعمله حاجات تافهة فى نظركم، فكروا كده كم مرة رأيكوا غير حياة إنسان السنة اللى فاتت لما علقتوا من غير لازمة؟

3– الحياة الافتراضية

مواقع التواصل الاجتماعى بقت بتتحكم فى حياتنا، وغير كده الفيس بوك بقى مليان posts عن إزاى حياتنا بقت جامدة، ومن غير خصوصية، وأغلبها مظاهر.

الموضوع ده بَوَّظ صداقات كتير وسَبِّب ضغط كبير على كل واحد فى حياته الشخصية. ابتدوا السنة الجديدة بحرية أكتر، بدل ماتعملوا Check in استمتعوا بالوقت، بدل ما تسجلوا إنكم بتقرأوا أو بتتفرجوا على حاجة، عيشوها واستمتعوا بيها، خلوا حياتكم حقيقية مش likes وcomments وchat.

4–  افصل

الإرهاق مش بس تعب جسدى، الإرهاق ممكن تبقى أفكار، أو صداقات بتضغط على صاحبها، ممكن يكون شُغْل وممكن يبقى تقصير الواحد فى حق نفسه، فيه طرق كتيره ممكن الواحد يتغلب بيها على الإرهاق زى تغيرات بسيطة فى اليوم، المشى مثلاً أو ممارسة أى هواية، تخلّوا عن أى شئ بيجهدكوا ماديًا أو عاطفيا، وافتكروا دايما لو إنك لو بتحب أى حاجة، عمرها ما هترهقك.

5–استمتع

كلنا بنتفائل بالبدايات الجديدة ولازم مع كل بداية الواحد يجدد نفسه كأنه بيعيش التجربة لأول مرة، زى الشجر ما بيجهز نفسه للربيع وينفض الورق عنه.