هدى السيد تكتب: #أساطير_ملهاش_تلاتين_لازمة (الزواج)

مذ صغرنا .. فوجئنا بكمية هائلة لا حصر لها من الأساطير .. بعيدة تمام البعد عن حياتنا الشبابية وقد تكون بعيدة أيضاً عن الدين والمنطق والواقع الذي نعيشه .. ! أساطير اعتقدناها .. وربما لم نفكر فيها .. لم نقيمها .. كأننا نعيش الحاضر ونجهز للمستقبل بأعين الماضي .. أعين الستينات في ثوب القرن الواحد والعشرين! نعيش واقعاً ربما يكون غير واقعياً .. واقع غير متناسب مع احتياجاتنا ومواردنا أيضاً .. ! واقع رسمته الأساطير و"كلام الناس" ! أساطير قد تتغذى على جهدنا وطاقتنا ومردودها لا يساوي ما سرقته منا .. كأننا نعيش في عالم الوهم .. لا يدري ماذا نكتم بداخلنا ليفرض علينا ما لا نطيقه. الزواج .. تلك الكلمة صاحبة الحروف المبعثرة .. لم تسلم من تلك الأساطير .. انغمس في القراءة كأنك تقرأ عن عالم افتراضي ذكر في كلمة عابرة على مسرح أثناء تحية الجمهور .. عدوا معي :)

الأسطورة الأولى:-

الحب المقنن بالسن!

لو بتحبي واحد أصغر منك .. انسي! ده بإعتبار ان أسطورة أكبر منك دي منطقية .. لو نفكر فيها اكنها لسه مش مطبقة حاليا .. هنلاقي ان اكبر اصغر مافرقتش .. المهم دين وخلق وناس تتعامل مع بعض وتفهم أساليب بعض وتوازن المهم ناس عارفة تكون أسرة ..

الأسطورة الثانية:- لما تتقدم للي بتحبها

وتلاقي أبوها منفوخ وأمها منفوخة وحاطين رجل على رجل .. شبكة بعشر تلاف جنية .. مهر خمسين ألف جنية شقة في الزمالك تمليك .. ده بإعتبار ان البنت دي انت هتشتريها مش هتتجوزها .. أو فرخة هتبيض بيضة دهب بعد كده فبتدفع اللي وراك واللي قدامك في جوازها مش انسان هتشاركه بقية حياتك ان شاء الله وده الحل معاهم .. تف في الصالون .. اشرب العصير وخد الكوباية وانت نازل وطلع لسانك لطنط وقولها كوباية نيشك هتتدغدغ تحت يا طنط .. وخد الشيكولاتة وانت نازل وقولهم عليها اقساط..

الأسطورة الثالثة:- الصيني والملامين والعفريت أزرقتين والبلاستيك وووووو ده بإعتبار انك كل يوم هتحدفي زوجك بطبق .. أو العيال تلاقي حاجة تكسرها لما تتولد احنا عملنا كده مع ماما هههههه دغدغنا كل حاجة واتبقى الفتات وكل ماتشوفهم تتحسر على فلوس جدو وتيتة اللي راحت ف"هااااا وقع مني والله .. مخدتش بالي" ..

الأسطورة الرابعة:- "جهاز البنات مابيخلصش"

ده بإعتبار انها بتجهز شارع الهرم معاها (هه هه هه هه) "ضحكة متقطعة .. لا هو سيادتك بيخلص بس عينك بتزهزه قدام كل جديد بتنزله الشركات حتى لو جبتي واحد زيه .. هات منه أربعة وده بيخلي الفقير عشان يتجوز يا يسرق يا مايتجوزش يا يتجوز مديون عشان احنا طبعنا فكرة الجهاز مابيخلصش

الأسطورة الخامسة:-

النيش .. إله الفرجة عند الفراعنة لما تقول كلمة نيش لازم تقول بعده .. تارارارارارااااااه .. لازم تجيب لبنتي نيش اومال تحط الهبل اللي جابته فين؟! الناس هتيجي تتفرج على ايه؟!

ده بإعتبار ان شوية الخشب دول عند الناس أهم من دين وخلق الرجل اللي بيسلموه بنتهم .. والنيش طبعا بيتقفل بمفتاح ومحدش بيجي ناحيته .. يعني زي ماتقول مسقع شوية فلوس بس مش هتستفيد حاجة .. لما تتقدم لواحدة اسأل مامتها نيشك فين يا طنط :D

الأسطورة السادسة:- انترية وصالون وسفرة ده بإعتبار انك كل يوم هتقعد على كرسي وتكسر كرسي على دماغ اللي اتجوزتها .. ٣ اوض للضيوف .. وفي ناس بتقعد على حصير الأسطورة السابعة:- لازم اهل العروسة يقعدوا يعملولها اكل لحد أسبوع أو ١٠ أيام .. يا جاهز يوميا .. يا في الفريزر يا دوب يدخل الفرن .. وتتعب أهلها قبل جوزاها بأسبوع في تحضير الأكل ده .. ده بإعتبار انها لما اتجوزت .. اتشلت مثلا

الأسطورة الثامنة:- ازاي هتعملي محشي او ممبار او الكلام ده ولسه مش فات سنة على جوازك ده بإعتبار ان الأكل اتسنن واتعمله قوانين من العادات والتقاليد تعملي ايه امتى وماتعمليش ايه امتى .. مفيش هنخرجه امتى؟ :D

الأسطورة التاسعة:- لازم بنتي يتعملها فرح في ڤيلا .. دي ليلة العمر بإعتبار ان بعد الليلة دي هنموت ومفيش ليالي تاني نفرح فيها .. ماينفعش نعمله في مكان كويس وسعره مهاود ونسافر بالفلوس دي نتفسح مثلا او نفرج كرب ناس مش عارفة تتجوز ونتفسح .. هنموت لو عملنا كده

الأسطورة العاشرة والأهم:- "كلااااام الناس" لا بيقدم ولا يأخر :D

ماينفعش نجيب كذا عشان الناس .. الناس هتقول .. الناس هتعيد .. الناس هتنف مين الناس دول وانا اضربهم عيارين وليه كل الناس بيقول الناس هتقول .. مين بيتكلم على مين بالضبط؟ ده بإعتبار ان الناس دي اهتمت أنا هكون مبسوطة ولا لأ .. وهل هعيش مع اللي بحبه مبسوطة ولا لازم يشوفوا عفش على ذوقهم في بيت انا اللي هعيش فيه

البساطة فن وذوق . اختر ما يعجب بشرط لا يخالف دينك.. عشان الدايرة واسعة اوي ماتضيقوهاش على نفسكم :)