للعروسين.. 7 فقرات لإحياء ليلة زفاف لن تُنْسَى

ليلة فرحك هى الليلة اللي دايمًا كنتي بتحلمي بيها.. عشان كده لازم تقرروا أنتي والعريس تخلوها ليلة مختلفة.. يحكى ويتحاكى عنها كل اللي حضرها.. ممكن يكون الاختلاف بتقديم فقرات جديدة تعلم مع المعازيم وتخليهم يفتكروا الليلة ديه طول عمرهم..

فقرة تمثيل 

اتفقوا قبل الفرح إن يبقى فيه فقرة تمثلوا فيها أنتي وهو على أغنية بتحبوها.. حتى لو مش بتعرفوا تمثلوا وتكونوا متفقين مع أصحابكوا يكون معاهم اكسسواراتها.. يعني مثلًا ممكن تتفقوا إن الدي جي يشغلوكوا أغنية (مايل واسجيني يا واد عمي) ويطلب من الناس انهم يفضوا البيست وتروح واحدة صاحبتك مدياكي ملاية لف وواحد من أصحاب عريسك يديله عمة يحطها على راسه وعصاية.. وقبل ما يجي كوبليه يا حلوة يا شايلة البلاص :D تخلي حد يديكي بلاص صغير كدة ترقصي بيه وهكذا.. صدقيني هتعملوا تفاعل حلو بين المعازيم.

ارقصي مع عريسك

لو كان نفسك ترقصي تانجو أو زومبا أو صلصة وعريسك كمان بيحب الرقصات ديه.. مفيش أحلى من فرحك إنك تعملي فقرة ليكي وليه وتختاروا رقصة وترقصوها سوا.. والرقصة ديه قبل الفرح بوقت روحوا أي مكان اتدربوا عليها كويس قوي عشان يوم فرحكوا تكونوا بترقصوا زي المحترفين بالظبط.

فقرة  شعبي

اتفقي أنتي وعريسك قبل الفرح انكوا تعملوا فقرة شعبي.. هتبقى كالأتي "دي جي" هيفضي البيست و عريسك هيطلع في نص الفرح على الكوشة زي النبطشي ويتكلم بصوته وينادي على أصحابه وأصحابك.. ويقول في أخر كلامه شغل الأغنية يا حموو يدلع اسم بتاع الد جي ويقول بعدها خشي يا عرووووسة..

طبعًا أنتي قبل ما يحصل كل ده هيطلع عريسك على الكوشة وأنت هتطلع برا القاعة وهو هينادي أصحابكوا ويجبهم في نص البيست.. وأول ما يقول خشي يا عروسة هتدخلي وانتي بترقصي شعبي وهينزل عريسك يولعها معاكي.

أما بقى لو عايزة تنهي فرحك بأفكار مختلفة تبقى ذكرى حلوة في نفوس كل اللي حضر الفرح بعيدًا عن أغنية سهر الليالي اللي دايمًا بتشتغل في أخر الفرح فممكن تختاري بين الأفكار ديه :) طَفّوا نور القاعة

اتفقي أنتى وعريسك مع المسئولين عن القاعة، إنهم يطفوا النور فجأة في نهاية الفرح، وتكونى في الوقت ده طلعتى برا القاعة، أنتي وعريسك من غير ما حد يلاحظ، والمسئولون عن القاعة أول ما تطلعوا يسلموكم "مايكات" ويفتحوا نور القاعة وفجأة هيسمعوا صوتكم فقط وأنتوا بتقولوا "إحنا قلنا نودعكوا بطريقة مختلفة... شكرًا إنكوا جيتوا وديه أغنية بهديها ليكوا أنا والعريس" وتغنوا انتوا الاتنين. :)

أكبر "سيلفى" لفرحك

في نهاية الفرح اطلعي انتي وعريسك عند الكوشة وقولوا لكل المعازيم اللي في القاعة: "يا جماعة كله ييجي حوالينا هنا عشان ناخد أكبر سيلفي نفضل فاكرينكوا بيه وانكوا قد ايه أسعدتونا النهارده".

أغنية من المعازيم

قولي للـDJ إن في نهاية فرحك يقول: "دلوقتي العرسان حابين إنهم يخلوا آخر أغنية في الفرح، حد من اللي مشرفنا النهاردة يغنيها، وإحنا كلنا هنقول وراه، مثلًا لو اللي طلع غني "يا صحبجية" كل اللي في القاعة يقول "يا لا لالي"

عهود (ما تتصدقش)

جهزي  ليلة فرحك مع أصحابك  ورقة بعهود ليكي وورقة للعريس بس بعهود تكون مضحكة وعمرها ما هتتحقق زي مثًلا

انتي: أوعدك ان عمري ما هحرق  قميصك

هو: أوعدك اني مش هتفرج على الماتش وقت المسلسل

هي: أوعدك أعمل لك محشى كل يوم

هو: أوعدك إنى أساعدك في شغل البيت

وهكذا :D .. وخلى الورقتين دول مع حد من أصحابك وأول ما تديلهم إشارة يجيبوا الورقتين وتديله ورقته وتدبسيه وتقولوا انتو الاتنين الوعود دي قدام المعازيم.