الاكتئاب دافع للنجاح.. إزاي يا جدع!

 أكتر حاجة بتتنشر عن الاكتئاب هى الأعراض اللى بنحس بيها.. الناس اللى انتحرت بسبب الحالة ديه.. نصائح إزاى نتعامل معاه.. غالبا الكل بيدون قصصه معاه والألم والوجع اللى مروا بيه.

فى ناس عملت أبحاث عن علاقة الاكتئاب بالفنون والإبداع.. معتمدين على حياة كتير من المبدعين الفنانين زى مارلين مونرو.. وسليفيا بلاث.. وليو تولستوى.. وتشارلز دكينز.. وجلال الدين الرومى.. السبب غالبا ورا ده هى النصيحة اللى بيتفق عليها ناس كتير "لازم تعمل حاجة جديدة أو تمارس هواية وتكتب يومياتك".. ساعتها بس بنعرف فوائد المرور بحالات الاكتئاب ☺.

اكتشف نفسك

خلال الاكتئاب دماغ الإنسان بتبقى مليانة أفكار مختلفة ومتقلبة.. ربطه للمعلومات بيختلف.. ونظرته بتبقى أعمق نتيجة للحالة النفسية... الكلام ده بيبان فى اليوميات خاصة فى حالة ممارسة هواية فنية.

ناس جديدة

مش دايما المصاب بالاكتئاب بيقفل على نفسه.. لأنه بنسبة كبيرة بيبقى محتاج يتكلم مع الناس اللى حواليه.. وبيتعرف على ناس جديدة.. كمان فى الغالب كتير بيفضلوا يسافروا يغيروا جو ويبدأوا صداقات جديدة مع الموجودين عشان الوقت يعدى ويستمتعوا بيه.

التفكير

الشخصيات المكتئبة بتفضل طول الوقت تفكر فى طريقة للخروج من الحالة اللى فيها.. وبتركز فى التفاصيل اللى سببتلها الحالة ديه.. اللحظة ديه مهارات التفكير والتحليل بتزيد عندك ومع الوقت قدرتك على تخطى المشاكل بتزيد.

تحديد أهدافك

التفكير الكتير بيوصلك إنك تحدد هدف فى حياتك تشتغل عليه عشان توصله.. وغالبا عشان تنسى السبب الرئيسى اللى تسبب فى وصولك لحالة الاكتئاب.. اللحظة ديه بتزيد طموحك بطريقة ملفتة.

زيادة الإحساس

تجربتك بتخليك تقدر أى اهتمام.. ببساطة بتطلع الإنسان اللى جواك.. بتخليك تبدأ تراعى مشاعر الناس وتديهم مساحة وتسمع وتتعاطف مع اللي بيمروا بمشاكل.. بتخليك تعيش كل لحظة فى حياتك وتستمتع بيها كمان.. من الآخر ده نص الكوباية المليان زى ما بيقولوا.

http://psychcentral.com/blog/archives/2010/01/22/10-good-things-about-depression/

https://www.psychologytoday.com/blog/fixing-families/201301/3-good-things-about-depression

http://edition.cnn.com/2014/01/22/world/the-dark-side-of-creativity-vincent-van-gogh/