الأطفال المتحرشون.. من قتل البراءة؟!
مكنتش أتخيل اني أطرح سؤال زي ده في يوم من الأيام، بس لأن ديه بقت ظاهرة لازم نرصدها ونشوف أسبابها ايه، ايه اللي يخلي طفل يتحرش !
غياب الأهل الأب اللي طلق مراته وسابها من غير فلوس تربي بيها ولاده، والأم اللي سابت عيالها وطفشت وراح جوزها رمى ولادهم عند قرايبه وسافر، والأهل اللي رموا ولادهم في الشارع، الأنواع ديه بمختلف أشكالها خلت مصير الطفل «الشارع» يتربى ويتعلم منه لحد ما بقى بالنسبة ليه بابا وماما . السينما وبعد لما بقى في الشارع بقى سهل إن أفلام البلطجة والتركيز على الستات السلط الملط، والألفاظ الخادشة للحياء تكون محببة بالنسبة ليه، فبقى يقلد اللي يشوفه على شاشة السينما، تلاقيه طالع من أي فيلم من الأفلام ديه بمكس تحرش على بلطجة على ألفاظ خادشة، يخليه لما ينزل الشارع عايز يتحرش بالناس ويبلطج عليهم ويشتمهم، وطبعاً المسئولين عن الأفلام ديه لسة شايفين لغاية ما بكتب حالأ انهم بيقدموا رسالة للشعب، تسألوني تقولولي ايه الرسالة ديه أقولكم معرفش، المنطق عجز قدامهم. القعدة مع الشباب الضايع قعدة الأطفال معاهم بتخليهم يطلعوا بقواميس إباحية يترجموها عملي في الشارع،ده حتى كمان ممكن يوصلوا انهم يشدوا كولة ويضربوا مخدرات وحشيش لأنهم بيعتبروا نفسهم انهم كبار زيهم زي الشباب دول.
