الشامبو والصابون «الطبي» يفرق عن العادي إيه؟
كتير مننا بتعاني من تلف الشعر، ومشاكل في البشرة، وجربت حاجات كتير ومفيش فايدة، وعشان كده سألنا على الحل وعرفنا الشامبو والصابون الطبي.. تعالوا نتعرف على الفرق بينهم وبين الشامبو والصابون العادي اللي بيوضحه لينا كرم محمد مسئول تجميل بصيدليات العزبي.
الفرق بين الشامبو العادى والطبّي
أي شامبو عادي بنستخدمه بياخد الغِذَا من الشعر وبيضعفه ويقصفه، وبعدين يوقعه عشان كدة دايمًا بنشتكي إن شعرنا مقصف وبيقع كتير.
أما الشامبو الطبي، فبيحافظ على الشعر وبيغذيه، وده لأن مكونات الشامبو بتحتوي على زيت زيتون وزبدة "الشيبا باتر" وزيت "جوجوبا" وغيرها من المكونات اللي بتخلي الشعر رطب.
وبجانب الشامبو بينصح كرم محمد، باستخدام البلسم وحمام الكريم، لأن الشامبو بيفتح أول طبقة في الشعر، بمعنى إنه بيغسلها وينعمها ولو اتساب الشعر بدون ما يتم تغليفه بالبلسم وحمام الكريم، هيكون عرضة للتلف بفعل أتربة الجو، وده لأن البلسم وحمام الكريم فيهم فيتامينات بتدي للشعر رونقه، وبتحافظ عليه من أي ضرر.
وعن أسماء منتجات الشامبو الطبي قالنا خبير التجميل أسماء أحسن المنتجات اللي فيه منها مستورد وفيه مصري والإتنين فيه منهم بلسم وحمام كريم.. المنتجات المصرية هى شامبو "بيوتي أند بيوند" و"ريجو" و"فايتر كير" أما المنتجات المستوردة فهى شامبو "جي كي" و"سومانج" و"ريفينو جين" و"نانو جين" و"فولتن" و"أكريتال" وقال كرم محمد إن الأطباء كمان بينصحوا باستخدام هذه المنتجات في علاج الشعر.
الفرق بين الصابون العادي والطبي في الاهتمام بالبشرة
الصابون العادي بيغسل البشرة من أي أتربة بتتعرض ليها علي مدار اليوم، لكن مش بيعالجها ويحافظ على نضارتها.
أما الصابون الطبي، فهو الأحسن طبعًا لأنه بيحافظ على نضارة ورطوبة كل أنواع البشرة وكمان بيعالجها لو فيها مشاكل، وكل مشكلة بتعاني منها البشرة بيكون ليها صابون معين تستخدمه، يعني لو البشرة دهنية فيها حبوب هتكون عايزة صابون فيه مادة بتمتص "الصيبم" اللي هو الدهون من البشرة وتعالج الحبوب، زي صابون أو غسول "بيودرما" و"سيبا ميد" و"يورياج" ولو كانت البشرة جافة هتحتاج لصابون يرطبها وينعمها زي صابون أو غسول "أفن كولد كريم" و"بيودرما اتودرم".
