أفكار «مختلفة» لهدية حبيبك في عيد ميلاده
كتير من البنات أول ما يقرب عيد ميلاد الشخص اللي مرتبطة بيه بيحتاروا وبيقعدوا يفكروا هيجيبوا ايه، وبيكونوا خايفين إن الحاجة متعجبوش وده اللي بيحصل في بعض الأحيان :D
وعشان فيه حاجة اسمها "فن اختيار الهدايا" على رأي شيرين عادل في فيلم بلبل حيران فـ«شبابيك» هتقولك في الموضوع ده عن اختيارات لأفكار هدايا تهادي بيها حبيبك.
تيشرت فريق
لو حبيبك ليه في الكورة وبيحب فرقة معينة وبيتابع ماتشاتها أول بأول وفيه لاعيب فيها بيحبه جدًا فمفيش أحلى من إنك تجيبيله التيشرت الأصلي للاعب ده لأنه هيعرف قد ايه إنك بتشاركيه اهتماماته.
فريق غنا
لو في فريق غنا كان نفسه يحضرله حفلة حاولي تشوفي حفلتهم الجاية امتى وتحجزي تيكيت ليه وليكي وحطي التيكت بتاعه في بوكس هدايا وحواليه حلويات، ولو الحفلة كانت قبل عيد ميلاده مش مشكلة قدميله البوكس برده واحضريها معاه.
تورتة عليها تشرد مدرسته :D
حاولي تكلمي أي حد من أصحابه يصورلك صوروا وهو في المدرسة الصور اللي فيها تشرد اللي كلنا دلوقت خايفين أصحابنا يطلعوها :D وطبعًا كل ده من غير ما يعرف وبعدين خدي الصور ديه ووديها لمحل حلويات خليه يعملك تورتة عليها صورته العادية في النص وحواليها صور التشرد.
وودي التورتة للمكان اللي ناوية تخرجي فيه معاه قبل عيد ميلاده بيوم، وشوفي اذا كنتي حبة تحتفلي بيه انتي وهو بس ولا تجيبي أصحابه و أصحابك وفي كلا الحالتين التورتة هتكون مفاجأتك ليه في اليوم ده.
وكمان ممكن جمب التورتة يكون فيه هدية تانية ممكن تعمليها، الهدية ديه تبقى مكالمة مدرس كان بيحبه جدًا والمدرس ده انتي هتسألي أصحابه عليه وتحاولي توصلي ليه ولو وصلتي ليه بس كان ربنا افتكره خلي حد من عيلته يكتبلك حاجة لحبيبك ويمضي الإمضة بتاعت المدرس، والمكالمة أو الإوتوجراف اللي هتديهولوا هيكونوا بعد ما يشوف التورتة على طول :)
ماكيت كارتون
ممكن تتخيلي شكله في حاجة معينة وتعمليها في ماكيت، زي مثلًا لو كان قالك انه نفسه يقابل ممثل معين اعملي ماكيت ليه هو والممثل ده وهما بيسلموا على بعض، أو لو كان قالك انه نفسه يسافر الهند اعملي ماكيت ليه وهو لابس لبس هندي وهكذا :D وفيه صفحات كتيرة على مواقع التواصل الإجتماعي بتعمل الماكيتات ديه زي صفحة The Art shop و صفحة He and she cartoon .
تابلوهات خشب
في صفحة على الفيس بوك اسمها خشبة تقدري تعملي من عليها مجموعة تابلوهات منحوتة من الخشب عليها صور بتحبيها ليه وصور ناس مشاهير بيحبهم جدًا بحيث يحوطها زي الشكل اللي بتقترحه خشبة في الصورة اللي تحت وممكن كمان تعملي تابلوهات فيها جمل بتحبوها انتوا الإتنين من أغاني او من روايات .
