6 نصائح تساعدك على التأقلم مع المدينة الجامعية

لو كان مجموعك في الثانوية العامة دخلك جامعة بعيدة عن محافظتك، يبقى أكيد سكنت أو لسه هتسكن في مدينة جامعية، يعني محتاج شوية نصايح تساعدك على التأقلم مع المدينة، خاصة الطلاب المستجدين سنة أولى جامعة، بنقدملك النصايح في التقرير ده.

فكر في مستقبلك

بالنسبة لطلبة - طالبات سنة أولى، كل متعيط وتحس إنك مكتئب علشان سيبت أهلك وانت مش متعود تبعد عنهم، فكر في مستقبلك وانك لازم تتعب علشان تكمل المشوار اللي بدأته، لما قررت تدخل ثانوية عامة.

يعني لازم تستحمل مشاكل الحاضر علشان ترتاح في المستقبل وتحقق اللي نفسك فيه، وخليك فاكر كمان ان السنة في الجامعة مش 12 شهر، زي ما احنا متعودين، لأ دي بالأجازات والتأجيلات هتبقى 7 أو 8 شهور بالكتير.

مكالمات فيديو

حمل برامج المكالمات المجانية والفيديو على موبايلك أو اللاب بتاعك، كده هتقدر تتواصل مع أهلك كل يوم، هتكلمهم صوت وصورة وشات.

وبالإضافة للفيس بوك، دي مجموعة من أفضل برامج المكالمات المجانية والفيديو، حمل منها اللي يناسب جهازك:

سكاي بي: ممكن تحمله على جهاز الكمبيوتر أو اللاب توب. لو عايز تحمله اضغط هنا:

فايبر: ممكن تحمله على موبايلك الاندرويد أو الايفون أو جهاز الكمبيوتر. لتحميله من متجر جوجل اضغط هنا: تانجو: ممكن تحميله على الهواتف الذكية ومعظم أنظمة تشغيل الكمبيوتر. للتحميل اضغط هنا: لاين: متوفر على الموبايلات وأجهزة الكمبيوتر. لتحميله من متجر جوجل اضغط هنا: وي شات: تحميله متاح على أجهزة الايفون والاندرويد وويندوز فون. للتحميل اضغط هنا:

احمد ربنا بقى انك سكنت مدينة في زمن الموبايل والفيس وغيره، مش زمن تليفون العملة وكروت ميناتل.

كون صداقات

ده شرط أساسي للتأقلم مع المدينة الجامعية، خليلك متأكد أنك هتحب المدينة أوي، ممكن أكتر من البيت كمان لو عندك صحاب، لأن معظم الوقت هيبقى هزار وضحك ولعب، متنساش تخلي شوية وقت للمذاكرة والجد.

غير أوضك

لو عدى أسبوع، اتنين، تلاتة، شهر، وحسيت أنك مش مرتاح مع الناس اللى معاك في الأوضة، ومش عارف تصاحبهم لازم تغير الأوضة، الكلام ده لسنة أولى، لأن بعد كده انت اللى بتختار الناس اللي هتسكن معاهم.

وده ممكن يكون بشكل رسمي بأنك تطلب من المشرفة نقلك لأوضة تانية، أو بشكل ودي يعني تبدل مع حد تاني قاعد في أوضة فيها صحابك، فيه حل تالت، هو انك تغلس وتروح تقعد مع صحابك طول اليوم من غير متنقل ولا تبدل.

رحلات المدينة

المدينة أحيانا بتنظم رحلات ومسابقات، اشترك فيها، وعلشان تضمن انك تلحق تسجل فيها قبل ما العدد يكتمل، اتصاحب على المشرفين- المشرفات، بكده انت هتبقى من العدد المحدود اللي قدر يسجل اسمه قبل ما الإعلان يتعلق أصلا.

يوم للترفيه

خصص يوم في الاسبوع تخرج وتتفسح فيه، خلال اقامتك بالمدينة، لوحدك أو مع صحابك، اليوم ده هيفرق كتير، انسى فيه كل اللي مضايقك وركز بس في إنك تفرح وتتبسط.