«من غير أنت وأنتي».. 4 طرق تجنب الشريكين تفاقم الأزمات
معظم المرتبطين لما بتواجههم مشاكل، بيقولوا لبعض كلام من نوعية «أنت أناني» أو «انتي ليه دايما بتنسي الي بقولهولك؟» أو «أنت مبتعملش التصرف الفلاني»...الخ
(ليسا فايرستون) ، اخصائية أمريكية في علم النفس وخبيرة في العلاقات الأسرية والزوجية، بتحكي عن أغلب الحالات الي بتجيلها، وازاي معظم الـcouples بيوصفوا هم "مش بيحبوا ايه"، وايه الحاجات الي بتبعدهم عن بعض أو بتخلق بينهم مسافات، لكن لما بتيجي تسألهم "انت عايز ايه من الطرف التاني؟ " مش بيعرفوا يجاوبوا، لأنهم غالبا مسألوش نفسهم السؤال دا.
بتقول أننا دايما بنركز على رفض الحاجات الي بتضايقنا، وعشان كدا لما نيجي نتناقش مع الطرف التاني بنشاور على الصفات والتصرفات السيئة اللي مش عايزينها، دا طبيعي لأن الأسهل إنك تنتقد السلبيات بدل ما تفكر بوضوح إيه الي انت عايزه بالزبط، لكن دا بيخلق مشاكل كتير.
لما بتنتقد حد، رد فعله الطبيعي أنه يحاول يدافع عن نفسه، ومحاولة الدفاع عن النفس بتلغي الهدف الأساسي اللي هو الوصول لحل يوفق ما بين رغبات الطرفين ويقرب مابينهم.
عشان كدا هي بتقول إن أحسن طريقة لانهاء أي خلاف هو انكو تقولوا لبعض "عايزين ايه بالزبط"، دا هيوفر عليكم كلام كتير وخناقات انتو في غنى عنها، كمان هيخليكو تقربوا من بعض وتفهموا بعض أكتر.
و دي 4 طرق بتقدمهم (ليسا) عشان تتواصلو مع بعض بشكل أفضل:
1- خلي هدفك الاول والاخير الحفاظ على علاقتكو
لما تبقو في نقاش حاد أو بتتخانقو مع بعض، جرب تكون الطرف اللي يرفع راية السلام الأول، يعني توضح إن علاقتكو بالنسبالك أهم من الفوز في النقاش، وإن هدفكو أنكو توصلو لحل، دا هيساعدكو تركزوا على ايه الحاجات الي عايزينها من بعض.
2-خليك على طبيعتك وبطل تكابر
ممكن يكون صعب على ناس كتير انها تتخلى عن نزعة الكبر أو الغطرسة، بس دا لازم في أي علاقة عشان توصل مشاعرك للطرف التاني، لما تعبر عن احتياجاتك لشريكك عبر عنها بصيغة الطلب والحاجة مش الأمر أو الواجب والمفروض، وعلى الجانب الآخر مش محتاج تعتذر أو تتأسف على أي حاجة.
3-متلعبش دور الضحية حاول متتكلمش دايما كأنك الشخص المظلوم، لأن في أي علاقة الطرفين بيأثرو في بعض وبيتسببوا في ردود أفعال بعض، تكرار الصورة الذهنية ليك على أنك الضحية هيأثر سلبا عليكو انتو الاتنين، وهيدي انطباع للطرف التاني انك غير ناضج وغير قادر على تحمل المسئولية.
4-ابعد عن كلمة :"أنت" أو "أنتي" لو كل الي بتقوله دايما لشريكك هو "أنتي مش بتسمعيني" أو " أنت مش فاهمني"، ودايما بتشتكي بنفس الأسلوب، فدا مش هيساعدكو، الأفضل أنك تعبر عنك أنت وتتكلم عن نفسك والحاجات اللي مضايقاك بصراحة ووضوح، مثلا بدل ما تقول " أنت مش بتسمعني" قول " أنا عايزاك تسمعني أكتر من كدا"، لان دا هيوصل للطرف التاني إشارة انك مش بتنتقده هو وإنما بتنتقد الفعل الي هو "عدم السماع" هنا وبالتالي مياخدش الكلام بشكل شخصي.
(ليسا) بتقول ان فكرة التعبير عن الاحتياجات مش سهلة بالنسبة لناس كتير، لأنها بتخلى الإنسان يتعرى من كل القيود الي اتربى عليها في العيلة والمجتمع ووسط صحابه، لكنها كمان بتقول أن "التعبير" عن الرغبات والحاجات الي محتاج الطرف التاني يعملها، دا أساس أي علاقة ناجحة.
