«لطلاب أولى».. إزاي تذاكر مادة الإعلام باللغة الأجنبية؟
كتب- أشرقت ممدوح
يقدم «شبابيك» نصائح لطلاب الفرقة الأولى بكليات وأقسام الإعلام في طريقة الإجابة على امتحان المادة الإعلامية باللغة الأجنبية.
النصائح تقدمها المعيدة بكلية الآداب قسم الإعلام جامعة عين شمس، أميرة جميل:
* المذاكرة في المادة دي بتكون عن طريق الفهم الجيد للمعاني وترجمة الكلمات الصعبة، وقراءة العناصر الأساسية أولا ثم العناصر الفرعية.
* التعريفات الداخلية مهمة جدا، وبلاش نعتمد على الملازم الخارجية لأنها بتكون ملخصة جدا، والتفاصيل في المادة دي مهمة.
* لو محتاج تترجم جمل أو كلمات استخدم قاموس أو مواقع مخصصة للترجمة، وبلاش الترجمة من جوجل.
* الامتحان في الغالب بيكون عبارة عن سؤالين، واحد مقالي وبيحتاج إنك تكتب فيه كتير ما لا يقل عن 10 نقاط، وبرضه لازم تركز على التفاصيل عشان لو فيه سؤال أكمل النقاط.
* لو حاسس نفسك ضعيف في الإنجليزي وفيه كلام بيقابلك بيكون صعب وتقيل، ممكن تشيل الكلام ده وتجيب الكلمات المرادفة ليها وتكون سهلة في نطقها وحفظها.
* وأنت بتجاوب مفيش حاجة اسمها تكتب كلام كله ورا بعضه، عشان يبقى كتير، لازم ترتب إجابتك وتنظمها عشان الدكتور يفهم إجابتك.
* لو جالك سؤال إنك عملت إنترفيو مع أحد الشخصيات، وده كان تكليف عملي وانت مكنتش عملته، سهل إنك تتخيل نفسك بتعمل إنترفيو وتكتبه بأسلوب سهل وبسيط.
